Ağdam, 6 fevral, Tahir Ağaməmmədov, AZƏRTAC

Füsunkar təbiəti, tarixi-mədəni abidələri ilə tanınan Qarabağda geniş turizm potensialı var. Bərpa-quruculuq işlərinin aparılması və sakinlərin doğma yurda qayıdışı ilə paralel olaraq bu ərazilərin turizm potensialının səmərəli istifadəsi, regionun rəqabət qabiliyyətli turizm məkanına çevrilməsi üçün tədbirlər görülür. Regionun digər yerlərində olduğu kimi, Ağdamda da genişmiqyaslı infrastruktur layihələri həyata keçirilir, tarixi-mədəniyyət abidələri bərpa edilir, müasir tələblərə cavab verən otellər inşa olunur.

Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin mətbuat katibi Leyla Sarabi AZƏRTAC-ın bölgə müxbirinə bildirib ki, Ağdamın erməni vandalizminə məruz qalmış tarixi memarlıq abidələrindən biri İmarət kompleksidir. Prezident İlham Əliyevin tapşırığına uyğun olaraq kompleks ötən il əsaslı şəkildə bərpa edilib. 3,3 hektar ərazini əhatə edən İmarət kompleksi mərasimlərin keçirilməsi üçün nəzərdə tutulmuş tikililər, türbələr, Qarabağ atlarının nümayiş olunması üçün atçılıq kompleksi və ziyarətçi mərkəzindən ibarətdir. Kompleks nəinki Qarabağın, eləcə də Azərbaycanın mühüm turizm və mədəniyyət mərkəzlərindən biridir. Kompleksə gələn qonaqlar, turistlər burada yaradılmış ziyarətçi mərkəzinin, muzey və kafenin xidmətlərindən istifadə edə bilirlər.

Ağdam şəhərindəki Cümə Məscidi Heydər Əliyev Fondu tərəfindən bərpa olunub. Qiyaslı məscidində və Qarabağ ərazisindəki ən məşhur abidələrdən biri olan Şahbulaq qalasında da bərpa işləri davam etməkdədir.

Ötən il sentyabrın 19-da Prezident İlham Əliyevin iştirakı ilə Ağdam şəhərində “Aghdam City Hotel”in açılışı oldu. Hazırda “Hilton Garden İnn” hotelinin tikintisi davam edir.

“Aghdam City Hotel”in əməliyyatlar üzrə rəhbəri Ayxan Cabbarov bildirib ki, beşmərtəbəli otel binası 130 otaq, restoran, iclas otaqları və bir böyük ziyafət zalından ibarətdir. Qonaqların sağlamlıq və istirahətini təmin etmək məqsədilə fitnes və SPA mərkəzləri də yaradılıb. Tam müasir və beynəlxalq standartlara cavab verən otelin otaqlarının 2-si fiziki məhdudiyyətli qonaqlar üçün, 4 otaq isə uzun müddət qalmaq istəyən qonaqlar üçün nəzərdə tutulub.

Ağdam şəhərində inşası davam edən digər otel “Hilton Garden Inn”dir. Layihə rəhbəri Sinan Rəcəblinin bildirdiyinə görə 2,16 hektar ərazidə inşa edilən otel 127 otaqdan ibarət olacaq. Burada həmçinin qapalı hovuz, fitnes və SPA mərkəzləri, terrasda restoranlar fəaliyyət göstərəcək. Oteldə işlər yekunlaşmaq üzrədir. Dəmir-beton işləri 90 faiz, fasad işləri 70 faiz, daxildə santexnika və bəzək işləri 40-50 faiz yekunlaşıb. Bu ilin üçüncü rübünə işlərin tam başa çatdırılması nəzərdə tutulur.

Görülən işlər, həyata keçirilən layihələr onu deməyə əsas verir ki, Ağdam tezliklə regionun cəlbedici turizm istiqamətlərindən birinə çevriləcək.