Ağdamda xeyir-şər evi istifadəyə verilmişdir
Ağdam, 20 mart (AZƏRTAC). Ağdam rayonunda məcburi köçkünlər üçün salınmış Dördyol-1 qəsəbəsində Rayon İcra Hakimiyyətinin (RİH) təşəbbüsü ilə xeyir-şər mərasimləri üçün inşa edilmiş bina istifadəyə verilmişdir.
AZƏRTAC xəbər verir ki, bu münasibətlə keçirilən mərasimdə çıxış edən RİH-nin başçısı Nizami Sadıqov qaçqın və məcburi köçkünləri Novruz bayramı münasibətilə təbrik etmiş, onlara göstərilən dövlət qayğısından, sosial problemlərinin həlli istiqamətində görülən işlərdən danışmışdır.
Məcburi köçkünlər göstərilən qayğıya görə minnətdarlıqlarını bildirmişlər.
Açılışı bildirən rəmzi lent kəsildikdən sonra burada məcburi köçkünlər üçün bayram süfrəsi açılmışdır. Novruz tonqalı qalanmış, Mədəniyyət və turizm şöbəsinin hazırladığı konsert proqramı iştirakçılarda əsl bayram sevinci yaratmışdır.
Xeyir-şər evi tələb olunan bütün avadanlıqla təmin olunmuş, kommunikasiya xətləri çəkilmiş, ətrafı abadlaşdırılmışdır.
Bölmənin digər xəbərləri
