AĞSUDA “SABİR POEZİYA GÜNLƏRİ” ÇƏRÇİVƏSİNDƏ TƏDBİR KEÇİRİLMİŞDİR
AZƏRTAC xəbər verir ki, mayın 30-da Ağsu şəhərinin mərkəzindəki Heydər Əliyev parkında dahi Azərbaycan şairi Mirzə Ələkbər Sabirin xatirəsinə həsr olunmuş “Sabir poeziya günləri” çərçivəsində tədbir keçirilmişdir.
Yüzlərlə sabirsevərin toplaşdığı, musiqili, şeirli, sənət məclisini rayon icra hakimiyyətinin başçısı Ənvər Seyidəliyev açmış, qonaqları salamlamışdır.
Respublikamızın tanınmış elm, sənət adamlarının, şairlərin iştirakı ilə keçirilən poeziya bayramında M.Ə.Sabirin həyat və fəaliyyəti, həmişəyaşar sənəti barədə ətraflı danışılmış, böyük satira ustasının dillər əzbəri olan məşhur şeirlərindən bəhs edilmişdir.
Qeyd olunmuşdur ki, əsası 1962-ci ildə qoyulmuş və xalq şairi Rəsul Rzanın, professor Abbas Zamanovun, xalq şairi Qabilin rəhbərliyi və təşkilatçılığı ilə hər il keçirilən “Sabir poeziya günləri” dahi şairin həmişəyaşar sənətinin öyrənilməsində və təbliğində xüsusi rol oynayır. Hazırda “Sabir poeziya günləri”nin təşkilat komitəsinə şair Fikrət Sadıq rəhbərlik edir.
Tədbirdə xalq şairi Zəlimxan Yaqub, Musa Yaqub, Ramiz Rövşən, Sabir Sarvan, xalq yazıçısı Gülhüseyn Hüseynoğlu, AMEA-nın müxbir üzvü, professor Teymur Kərimov, əməkdar artist Ağalar Bayramov və başqaları çıxış etmiş, Sabirin yüksək zirvələri fəth etmiş poeziyasının məziyyətlərindən danışmış, şeirlərindən nümunələr söyləmişlər.
Əməkdar müəllim, Sabir ocağının gəlini Zemfira Tahirli xatirələrini danışmış, böyük sənətkara, onun yaradıcılığına bəslənən diqqət və məhəbbətə görə təşəkkürünü bildirmişdir.
Bölmənin digər xəbərləri
