AHILLAR GÜNÜ SƏBAİL RAYONUNDAGENIŞ QEYD OLUNMUŞDUR
AZƏRTAC xəbər verir ki, 1 oktyabr - Ahıllar günü münasibətilə Səbail rayonunda geniş bayram tədbirləri keçirilmişdir. Rayon İcra hakimiyyətindən bildirmişlər ki, bayram ərəfəsində rayon Veteranlar Təşkilatı Şurası, Qızıl Aypara Cəmiyyəti və sosial, müdafiə mərkəzinin nümayəndələri yaşlı nəslin problemləri ilə maraqlanmış, rəy və təkliflərini öyrənmişdir. Rayon İcra hakimiyyəti başçısı aparatının, təhsil müəssisələrinin nümayəndələri, şagirdlər tənha və yataq xəstəsi olan ahıllara baş çəkmiş, onlara bayram sovqatı paylamışlar. Badamdar qəsəbəsindəki “İbrahim” şadlıq sarayında, “Sahil” kafesində və digər yerlərdə ahıllar və kimsəsizlər üçün bayram süfrələri açılmışdır.
Ahıllar, veteranlar və kimsəsizlər onları yada saldıqları və sevindirdikləri üçün dövlətimizin başçısına və təşkilatçılara minnətdarlıq etmiş, bu cür tədbirlərin təşkilini Azərbaycan Prezidentinin yaşlı nəslə göstərdiyi diqqət və qayğının təzahürü kimi qiymətləndirmişlər.
