Aİ-nin Qırmızı dənizdəki hərbi missiyasına İtaliya və ya Fransa komandanlıq edəcək
Roma, 1 fevral, AZƏRTAC
Avropa İttifaqının Qırmızı dənizə göndərəcəyi birgə hərbi missiya İtaliya və ya Fransanın komandanlığı ilə fəaliyyət göstərəcək.
AZƏRTAC xəbər verir ki, bunu İtaliya Baş nazirinin müavini, xarici işlər və beynəlxalq əməkdaşlıq naziri Antonio Tayani deyib.
Nazir missiyanın məqsədinin husilərin Qırmızı dənizdə beynəlxalq ticarətə təsir edən hücumlarının qarşısını almaq, ticarət gəmilərinin müdafiəsini gücləndirmək olduğunu bildirib. Vurğulayıb ki, hərbi missiyanın təşkili ilə bağlı danışıqlar davam edir.
“Bu, dəniz ticarətinin təhlükəsizliyini təmin etmək üçün hərbi müdafiə missiyasıdır”, - deyə Baş nazirinin müavini əlavə edib.
Xatırladaq ki, Avropa İttifaqına üzv ölkələrin nazirləri yanvarın 22-də Qırmızı dənizə hərbi missiya göndərilməsi planı barədə razılığa gəlib. Missiya BMT-nin Dəniz Hüquqları Konvensiyasına uyğun fəaliyyət göstərəcək və müdafiə xarakterli olacaq.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
