AKİ-nin maliyyə ayırdığı layihə BelDocs Pitçinq Forumunda iştirak edəcək
Bakı, 21 may, AZƏRTAC
Balkan regionunun ən nüfuzlu festivallarından hesab edilən XVIII BelDocs Beynəlxalq Sənədli Film Festivalının (21-28 may) BelDocs Sənaye Günlərinin Pitçinq Forumuna bu il Azərbaycandan təkcə “Nəvə” tammetrajlı sənədli film layihəsi seçilib.
Bu barədə AZƏRTAC-a Azərbaycan Kinematoqrafçılar İttifaqından (AKİ) məlumat verilib.
Bildirilib ki, builki proqram “İnkişaf” və “Proqress” başlığı altında iki fərqli kateqoriyada müraciət qəbulunu açıq elan edib: Qərbi Balkan regionu (Albaniya, Bosniya və Herseqovina, Xorvatiya, Kosovo, Monteneqro, Şimali Makedoniya, Sloveniya, Serbiya), Baltik regionu ( Latviya, Litva, Estoniya) və Azərbaycan, Gürcüstan, Ermənistan, Moldova, Ukrayna və fokusda olan ölkə – Polşa.
“İnkişaf” kateqoriyasında Azərbaycandan layihə seçilməsə də, ümumilikdə yuxarıda adıçəkilən ölkələrdən 20 film layihəsi iştirak edir.
Qeyd edək ki, beynəlxalq forum iştirakçıları və münsif önündə pitçinq üçün “Nəvə” filminin rejissor və prodüseri Afaq Yusifli, həmprodüseri Murad Allahverdinin layihədə iştirakının səfər xərclərinə Azərbaycan Kinematoqrafçılar İttifaqı maddi dəstək göstərib.
Bölmənin digər xəbərləri
