Aktau şəhərində Azərbaycanda “Konstitusiya və Suverenlik İli”nə həsr olunan konfrans keçirilib
Aktau, 2 may, AZƏRTAC
Qazaxıstanın Aktau şəhərində Azərbaycanda 2025-ci ilin “Konstitusiya və Suverenlik İli” elan edilməsi ilə əlaqədar tədbir keçirilib.
AZƏRTAC xəbər verir ki, mayın 2-də Ş.Yessenov adına Xəzər Texnologiya və Mühəndislik Universitetində “Mədəniyyətlərarası dialoq, müasir konstitusionalizm və suverenlik” mövzusunda konfrans reallaşıb.
Tədbir “Azərbaycan Mərkəzi”, baş konsulluq, universitet, yerli diaspor təşkilatları və Azərbaycan Respublikasının Diasporla İş üzrə Dövlət Komitəsinin dəstəyi ilə təşkil olunub.
Konfransda universitetin rəhbərliyi və professor-müəllim heyəti, diplomatik korpusun nümayəndələri, o cümlədən Türkiyə, Özbəkistan, Türkmənistan və İranın Aktaudakı baş konsulları, eləcə də Azərbaycan diasporunun üzvləri iştirak ediblər.
Tədbiri “Azərbaycan Mərkəzi”nin rəhbəri İlkin Orucov açıb. Ardınca baş konsul Ayxan Süleymanlı, rektor Berik Axmetov, professorlar Eldar Cəfərov və Akmaral Medixanova, kafedra müdiri Bağdad Aueşova çıxış ediblər.
Baş konsul çıxışında Prezidentin Sərəncamı ilə 2025-ci ilin “Konstitusiya və Suverenlik İli” elan edilməsinin əhəmiyyətini vurğulayıb.
Ayxan Süleymanlı Ümummilli Lider Heydər Əliyevin rəhbərliyi ilə hazırlanmış müstəqil Azərbaycanın ilk Konstitusiyasının 1995-ci il noyabrın 12-də ümumxalq səsverməsi yolu ilə qəbul edildiyini və həmin tarixin Azərbaycanda Konstitusiya Günü kimi qeyd olunduğunu konfrans iştirakçılarının diqqətinə çatdırıb.
Baş konsul 2020-ci il Vətən müharibəsi və 2023-cü il antiterror əməliyyatı nəticəsində Azərbaycanın suverenliyinin və ərazi bütövlüyünün tam bərpa olunduğunu diqqətə çatdırıb. Diplomat Azərbaycan Respublikası Prezidentinin 2024-cü il 19 sentyabr tarixli Sərəncamına əsasən, 20 sentyabr Dövlət Suverenliyi Günü elan edildiyini xatırladıb.
O, həmçinin Azərbaycan və Qazaxıstan prezidentləri arasında dostluğa əsaslanan yüksəksəviyyəli əməkdaşlıq, xalqlar arasında isə mədəni, tarixi və dini bağların mövcudluğunu vurğulayıb.
Çıxışlarda konstitusiyanın dövlətin hüquqi və siyasi əsaslarını müəyyən edən sənəd kimi rolu, vətəndaş hüquqlarının təminindəki əhəmiyyəti qeyd olunub.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
