Almaniya jurnalı Azərbaycan-Almaniya münasibətlərindən bəhs edib
Berlin, 18 yanvar, AZƏRTAC
Almaniyanın “Diplomatisches Magazin” jurnalının son buraxılışında dərc olunmuş “Bundestaqın deputatları ilə birlikdə Alman-Azərbaycan axşamı” adlı məqalədə səfirlik, Azərbaycan Tələbə Şəbəkəsi və Alman Cəmiyyətinin birgə təşkilatçılığı ilə 2015-ci ilin dekabrında keçirilmiş, Almaniya-Azərbaycan münasibətlərinin keçmişi və hazırkı vəziyyətinin müzakirə olunduğu tədbir barədə söhbət açılır.
Məlumatda qeyd olunur ki, Avropa Məlumat Mərkəzində keçirilmiş tədbirdə çoxlu sayda yüksək vəzifəli qonaqlar iştirak ediblər. Tədbirdə çıxış edən Azərbaycan Tələbə Şəbəkəsinin icraçı direktoru İbrahim Əhmədov Azərbaycan və alman xalqlarının birgə dəyərləri olduğunu və bu dəyərlərin onların dostluq münasibətlərinin əsasında dayandığını vurğulayıb.
Berlin Humboldt Universitetinin “Azərbaycan tarixi” kafedrasının rəhbəri, professor Eva Mariya Aux tədbirdə Cənubi Qafqazda məskunlaşmış almanların həyatı barədə mühazirə oxuyub.
Səfir Pərviz Şahbazov Almaniyanı 2016-cı ildə ATƏT-ə sədrliyi çərçivəsində Dağlıq Qarabağ münaqişəsinin həlli istiqamətində daha fəal rol oynamağa çağırıb.
Daha sonra Almaniya Bundestaqının deputatları və Azərbaycan səfiri Almaniya-Azərbaycan münasibətlərinin bu günü və gələcəyinə dair müzakirələr aparıblar.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
