ALMANİYANIN ALİ TƏHSİL ÜZRƏ MÜTƏXƏSSİSLƏRİ BAKIYA GƏLƏCƏKLƏR
AZƏRTAC-ın xüsusi müxbiri Berlindən xəbər verir ki, AAMRK-ın vitse-prezidenti, Osnabruq Tətbiqi Elmlər Universitetinin rektoru, professor Erhard Milenhauzen, qurumun katibliyinin beynəlxalq əlaqələr idarəsinin əməkdaşı Gerhard Dudan və Brandenburq əyalətinin Elm, Tədqiqat və Mədəniyyət Nazirliyinin əməkdaşı, professor Ulrix Şmidtdən ibarət nümayəndə heyəti bu il sentyabrın 9-12-də Bakıda işgüzar səfərdə olacaqdır. Bu səfər Almaniya ilə Azərbaycan arasında mədəniyyət sahəsində əməkdaşlıq haqqında imzalanmış dövlətlərarası sazişə uyğun olaraq həyata keçiriləcəkdir. Səfər ali təhsil siyasəti məsələlərində əməkdaşlığa, eləcə də Azərbaycan tərəfinə bu sahədə islahatların həyata keçirilməsinə dair məsləhətlər vermək və əməli yardım göstərmək məqsədi daşıyır.
Bu məsələlər hələ ötən il noyabrın 4-6-da Drezden şəhərində Almaniya-Azərbaycan müştərək komissiyasının iclasında müzakirə edilmiş və müvafiq qərar qəbul olunmuşdur.
Bölmənin digər xəbərləri
