ALMANİYANIN CƏNUBUNDA TƏYYARƏ QƏZASI
Rusiyanın Tu-154 sərnişin təyyarəsinin ən iri parçaları Ştutqartdan 120 kilometr cənubda yerləşən Yuberlinq şəhəri yaxınlığındakı sahəyə düşmüşdür. Yüzlərlə polis vertolyotların köməyi ilə təyyarənin qalıqlarını, ölənlərin cəsədlərini və şəxsi əşyalarını axtarmaq məqsədi ilə ətraf yerləri araşdırırlar . Hələlik 15 meyid tapılmışdır.
İTAR_TASS-ın verdiyi xəbərə görə, Moskvadan Barselonaya uçan Tu-154 təyyarəsi iyulun 1-də gecə 12 min metr yüksəklikdə Bəhreyndən Brüsselə uçan “Boinq-757” yük təyyarəsi ilə toqquşmuşdur. Təyyarələrin qalıqları 30 kilometr sahəyə səpələnmişdir. Xoşbəxtlikdən, yerli sakinlərdən heç kəs zərər çəkməmişdir. Təyyarələrin iri parçası uşaq internatı binasının cəmi 500 metrliyinə düşmüşdür.
Baden-Vürtemberq əyalətinin baş naziri qəza yerində olarkən demişdir:”Bu qədər insan həyatına son qoymuş ağır faciə bizi dərindən sarsıtmışdır”. Rəsmi məlumata görə, qəza nəticəsində 71 sərnişin, o cümlədən Başqırdıstanın 52 məktəblisi, Tu-154 təyyarəsinin heyəti və “Boinq”in iki pilotu həlak olmuşdur. Məktəblilər YUNESKO xətti ilə İspaniyaya istirahətə gedirdilər.
Başqırdıstan Prezidenti Murtaza Rəhimovun fərmanı ilə respublikada matəm elan edilmişdir.
Bölmənin digər xəbərləri
