ALMANİYANIN LÜDVİQSHAFEN ŞƏHƏRİ İLƏ DOSTLUQ ƏLAQƏLƏRİNİN 25 İLLİYİNƏ HƏSR OLUNMUŞDUR
Almaniyanın Lüdviqshafen şəhəri ilə dostluq mıünasibətləri yaradılmasının 25 illiyi və tərəfdaşlıq münasibətlərinin 15 illiyi münasibətilə İyulun 3-dən 7-dək Sumqayıtda təntənələr keçirilir.
Yubeley tədbirləri ilə əlaqədar Lüdviqshafen şəhərinin oberburqomistri xanım Yeva Lauze başda olmaqla Sumqayıta gəlmiş mötəbər nümayəndə heyəti əvvəlcə şəhərdəki Şəhidlər xiyabanını ziyarət edərək, əbədi məşəlin önünə əklil qoymuş, Vətənimizin müstəqilliyi və ərazi bütövlüyü uğrunda canlarından keçmiş cəsur övladlarımızın məzarları üstünə tər çiçək dəstələri düzmüşdür. Alman qəbiristanlığında dəfn olunmuş Almaniya vətəndaşlarının məzarları üzərinə də gül-çiçək qoyulmuşdur. Qonaqlar müharibədən sonrakı illərdə qəriblikdə dünyasını dəyişmiş bu insanların xatirəsinə göstərilən diqqətə görə təşəkkürlərini bildirmişlər.
AFR-in Azərbaycandakı səfirliyi Sumqayıtla Lüdviqshafen arasında dostluq əlaqələri yaradılmasının 25 illiyi və tərəfdaşlıq münasibətlərinin 15 illiyi şərəfinə qəbul təşkil etmişdir. Almaniya Federativ Respublikasının səfiri, professor Klaus Qrevlix toplaşanları salamlayaraq, ölkələrimiz arasında münasibətlərin inkişafının möhkəmləndirilməsi işində iki şəhərin tərəfdaşlığının vacibliyini və xüsusi əhəmiyyətini vurğuladı, alman dilinin öyrənilməsi sahəsində ixtisaslaşan 15 nömrəli şəhər məktəbinə səfirliyin kömək və dəstəyindən danışmışlar.
Tərəfdaş şəhərlərin rəhbərləri qəbulda çıxış edərək bildirmişlər ki, 25 illik dostluq əlaqələri sonralar tərəfdaşlıq münasibətlərinə çevrilmiş, iki sənaye mərkəzi arasında münasibətlərin statusunu rəsmi surətdə möhkəmləndirməklə özünü tamamilə doğrultmuşdur. Sumqayıt şəhər icra hakimiyyətinin başçısı Təvəkkül Məmmədov demişdir ki, bu münasibətlər sınaqlardan çıxmışdır. Erməni separatçılarının əli ilə dünya mətbuatında Sumqayıtın mənfi obrazının yaradıldığı 1988-ci ilin ağır günlərində Azərbaycan xalqının tarixinə, mədəniyyətinə, psixologiyasına yaxşı bələd olan lüdviqshafenlilər bizi dəstəklədilər. Sumqayıtlılar bunu minnətdarlıqla xatırlayırlar.
Yubiley təntənələrinin proqramı maraqlı və zəngindir. Minlərlə sumqayıtlının toplaşdığı Nəsimi adına mədəniyyət və istirahət parkında dostluq bayramı keçirilmişdir.
Yaranmış ənənəyə görə, tərəfdaş şəhərlərin rəhbərləri yubeley tədbirləri çərçivəsində şəhər parkında əbədi dostluq rəmzi olan ağaclar əkmişlər.
Sonra Sumqayıt və Lüdviqshafen şəhərlərinin Alman Texniki Yardım Cəmiyyətinin, AFR-in iqtisadi əməkdaşlıq və inkişaf nazirliyinin layihəsində iştirakına dair saziş imzalanmışdır.
Sumqayıtın tarix muzeyində qonaqlar iki şəhərin 25 illik əlaqələrinin tarixini xronoloji qaydada əks etdirən ekspozisiya ilə - sənədlər, fotomateriallar, yadıgar hədiyyələr ilə maraqla tanış olmuşlar. Muzeydə “Almaniya Sumqayıt məktəblilərinin gözü ilə“ sərgisi də açılmışdır.
Kimyaçıların Üzeyir Hacıbəyov adına mədəniyyət sarayında Lüdviqshafenin pop-qrupunun iştirakı ilə böyük konsert olmuşdur. Alman müsiqiçilərinin məhəratli çıxışı maraqla qarşılanmışdır.
Sumqayıt rəhbərliyi yubiley təntənələri şərəfinə qəbul təşkil etmişdir.
Almaniya nümayəndə heyətinin üzvü, dostluq münasibətlərinin beşiyi başında duranılardan biri, dəfələrlə Sumqayıtda olmuş cənab Gisbert Hoyzelman AZƏRTAC-ın müxbiri ilə söhbətində demişdir ki, Sumqayıt 25 il bundan əvvəl SSRİ-nin tərkibində idi və biz bir-birimizdən təcrid olunmuşduq. Hər şey çox çətinliklə başlanırdı. Lakin hər iki şəhərin və xalqın qarşılıqlı marağı və əməkdaşlıq səyləri göz qabağında idi. Beləliklə, 25 il ərzində müxtəlif sahələri təmsil edən mütəxəssislərdən, elm, incəsənət və həmkarlar ittifaqları xadimlərindən, gənclər qruplarından, məktəblilər və idmançılardan ibarət 53 nümayəndə heyəti mübadiləsi olmuşdur. Mindən çox sakin bir-birinə qonaq getmişdir. Cənab Hoyzelman vurğulamışdır ki, biz Sumqayıtla tərəfdaşlıq münasibətlərimizi bundan sonra da genişləndirmək və möhkəmləndirmək niyyətindəyik. Hesab edirik ki, məqsədli nümayəndə heyətləri mübadiləsi ilə, ümumi problemləri birgə müzakirə etməklə onların həllini tapacağıq və beləliklə, ümumi siyasətimizə - yer üzərində sülhü qoruyub saxlamaq siyasətində daha fəal surətdə dəstək verə biləcəyik.
Bölmənin digər xəbərləri
