Ankarada Türkiyə və Rusiya nümayəndə heyətləri İdlibdəki vəziyyəti müzakirə ediblər
Ankara, 9 fevral, AZƏRTAC
Rusiya Xarici İşlər nazirinin müavini Sergey Verşininin və Prezident Vladimir Putinin Suriya məsələləri üzrə xüsusi nümayəndəsi Aleksandr Lavrentiyevin daxil olduğu nümayəndə heyəti Türkiyədə səfərdədir.
AZƏRTAC Türkiyə Xarici İşlər Nazirliyinə istinadla xəbər verir ki, hərbçilərdən və təhlükəsizlik qüvvələri əməkdaşlarından ibarət heyət Ankarada görüşlər keçirib.
Görüşdə Türkiyə Milli Müdafiə Nazirliyinin, Milli Təhlükəsizlik Təşkilatının (MİT), Silahlı Qüvvələrin Baş Qərargahının nümayəndələrindən ibarət heyətə Xarici İşlər nazirinin müavini Sedat Önal başçılıq edib.
Nümayəndə heyətlərinin görüşlərində Suriyanın İdlib bölgəsindəki hazırkı vəziyyət müzakirə olunub. Tərəflər bölgədə sabitliyin qorunması və siyasi proseslərin irəliləməsi üçün lazımi addımların atılması barədə razılığa gəliblər. İki ölkə arasında geniş tərkibli nümayəndə heyətlərinin görüşlərinin gələn həftə də davam etdirilməsi qərara alınıb.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
