Kənd Təsərrüfatı Nazirliyindən AZƏRTAC-ın müxbirinə bildirmişlər ki, aqrar islahatların nəticəsində hazırda ölkədə 100 mindən artıq kəndli (fermer) təsərrüfatı qeydə alınmışdır. Prezident İlham Əliyevin “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” 24 noyabr tarixli Fərmanı aqrar sahə qarşısında da ciddi vəzifələr qoyur. Qarşıdakı illər ərzində kənd təsərrüfatı məhsullarının sürətli istehsalına nail olmaqla bolluq yaratmaq, dünya bazarına rəqabətqabiliyyətli məhsul çıxarmaq, kəndin sosial-iqtisadi inkişafını və əhalinin məşğulluğunu təmin etmək əsas vəzifədir. Bundan ötrü qısa, orta və uzunmüddətli kreditlərin maneəsiz verilməsi vacibdir. Dövlət bu problemə də diqqət yetirmişdir. “Aqrar Kredit Fondu” ilə “Aqrarkredit” səhmdar kommersiya təşkilatının birləşdirilməsi nəticəsində kənd təsərrüfatının kreditləşməsinə yönəldilmiş layihə vəsaitlərindən daha səmərəli istifadə olunur. Respublikanın bütün rayonlarında kənd təsərrüfatı məhsullarının istehsalı ilə məşgul olan fiziki və hüquqi şəxslərə kredit verilməsi üçün imkan yaranmışdır. Xaçmazda süd məhsullarının emalı müəssisəsinin tikintisinə, Xaçmaz və Lənkəran rayonlarında kənd təsərrüfatı məhsullarının konservləşdirilməsi müəssisələrinin işə salınmasına maliyyə yardımı edilmişdir.