AQTA sahibkarlar arasında onlayn sorğu keçirir
Bakı, 21 yanvar, AZƏRTAC
Azərbaycan Qida Təhlükəsizliyi Agentliyi (AQTA) həyata keçirilən tədbirlərin və Qida Təhlükəsizliyi İnstitutu (AQTİ) tərəfindən göstərilən xidmətlərin səviyyəsini, həmçinin ictimai rəyi öyrənmək üçün mütəmadi olaraq onlayn qaydada sorğular keçirir.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, sorğuların keçirilməsində məqsəd sahibkarlıq subyektlərinə göstərilən xidmətlərin, eləcə də fitosanitar və baytarlıq nəzarəti, qeydiyyat və idxal-ixrac əməliyyatlarının təkmilləşdirilməsindən ibarətdir.
AQTA həyata keçirilən tədbirlərin inklüzivliyini, əhatəliliyini və səmərəliliyini daha da artırmaq məqsədilə qida sahəsində fəaliyyət göstərən sahibkarlıq subyektlərini onlayn sorğularda iştiraka dəvət edir.
Sahibkarlıq subyektləri afsa.gov.az/az/info/query keçidinə daxil olaraq “Qida Təhlükəsizliyi sahəsində ictimai nəzarət mexanizmlərinin gücləndirilməsi istiqamətində istehlakçıların prosesdə aktiv iştirakı”, "Laborator xidmətlərin göstərilməsi", "Qeydiyyat və dövlət reyestrinin aparılması", "Fitosanitar, baytarlıq və qida təhlükəsizliyi nəzarəti tətbiq olunan yüklərin idxalı", "Fitosanitar, baytarlıq və qida təhlükəsizliyi nəzarəti tətbiq olunan yüklərin ixracı" və digər mövzularda hazırlanmış sorğularda iştirak edə bilərlər.
Bölmənin digər xəbərləri
