ARDNŞ-DƏ MACARISTANIN “MOL” ŞİRKƏTİNİN NÜMAYƏNDƏLƏRİ İLƏ GÖRÜŞ KEÇİRİLMİŞDİR
AZƏRTAC xəbər verir ki, iyulun 7-də Azərbaycan Respublikasının Dövlət Neft Şirkətində Macarıstanın “Mol” Neft və Qaz Şirkətinin baş icraçı direktoru Georgi Mosonyinin rəhbərlik etdiyi nümayəndə heyəti ilə görüş keçirilmişdir.
ARDNŞ prezidenti Rövnəq Abdullayev son vaxtlar Dövlət Neft Şirkəti ilə “Mol” şirkəti arasında münasibətlərin yaxınlaşdığını söyləmiş, qeyd etmişdir ki, bu səfər əlaqələrin inkişafına daha güclü təkan verəcəkdir.
ARDNŞ prezidentinin fikri ilə tamamilə razılaşdığını qeyd edən qonaq, Macarıstanın Baş nazirinin Azərbaycana rəsmi səfərinin ölkələrimizin dövlət neft şirkətləri arasında əməkdaşlıq üçün yeni imkanlar açacağına əminliyini ifadə etmişdir.
Görüşdə vurğulanmışdır ki, Azərbaycan Avropanın enerji təhlükəsizliyində maraqlıdır və bu prosesdə iştirak edən əsas tərəfdaşlardan biridir. ARDNŞ prezidenti son illər dünyada Azərbaycan təbii qazına marağın yüksəldiyini söyləmiş, qeyd etmişdir ki, ölkəmizdə qaz hasilatı ilbəil artır və bu sahədə Azərbaycanın ixrac potensialı genişlənir. R.Abdullayev bu məqsədlə ARDNŞ-də həyata keçirilən kompleks qaz proqramının və “Şahdəniz” layihəsi üzrə işlərin gedişi barədə qonağa ətraflı məlumat vermişdir. Qeyd olunmuşdur ki, Azərbaycan həm də digər Xəzəryanı ölkələrdə hasil olunan təbii qazın öz ərazisindən Avropaya nəql olunmasında tranzit imkanları yaratmağa hazırdır.
Görüşdə, həmçinin “Nabukko” layihəsi ətrafında əməkdaşlığın fəallaşdırılması imkanları nəzərdən keçirilmiş, hər iki tərəfi maraqlandıran digər məsələlər barədə fikir mübadiləsi aparılmışdır.
Bölmənin digər xəbərləri
