Britaniya hökumətindən hədəf: məktəblilərin 60 faizi dərslərə piyada və ya velosipedlə gedəcək
London, 12 iyun, AZƏRTAC
Böyük Britaniya hökuməti 2035-ci ilədək İngiltərədə məktəblilərin ən azı 60 faizinin məktəbə piyada və ya velosipedlə getməsini təmin etməyi qarşıya məqsəd qoyub.
AZƏRTAC BBC-yə istinadla xəbər verir ki, hökumətin yeni aktiv hərəkətlilik strategiyasına əsasən, milyardlarla funt sterlinqlik investisiyalar hesabına uşaqlar üçün daha təhlükəsiz piyada və velosiped marşrutları yaradılacaq. Plan çərçivəsində şəhər və qəsəbələrdə qısaməsafəli səfərlərin ən azı yarısının piyada və ya velosipedlə həyata keçirilməsi nəzərdə tutulur. Həmçinin növbəti beş il ərzində ölkə üzrə vahid piyada və velosiped şəbəkəsinin marşrut xəritəsi tətbiqlərinə inteqrasiya olunacağı bildirilir.
Nəqliyyat naziri Heydi Aleksander strategiyanın daha çox insan üçün aktiv hərəkəti praktik seçimə çevirməyi hədəflədiyini vurğulayıb. Nəqliyyat Nazirliyinin məlumatına görə, məqsədə çatmaq üçün 2030-cu ilədək 5 min piyada, əlil arabası və velosiped marşrutu, həmçinin 10 min daha təhlükəsiz yol keçidi inşa ediləcək. Hökumətin 2023-cü ilə aid son statistikasına əsasən, hazırda İngiltərədə 5-16 yaşlı uşaqların 47 faizi məktəbə piyada və ya velosipedlə gedir. Yeni strategiya bu göstəricinin növbəti on il ərzində əhəmiyyətli dərəcədə artırılmasını nəzərdə tutur.
Bölmənin digər xəbərləri
