Bakı, 12 noyabr (AZƏRTAC). Argentinanın aparıcı kütləvi informasiya vasitələrindən olan “Pagina 12” qəzetində Qraciella Cutulinin “Azərbaycan. Odlar Yurdu. Qafqazın məşəlləri” sərlövhəli məqaləsi dərc olunmuşdur.

Xarici İşlər Nazirliyinin mətbuat xidmətindən AZƏRTAC-a verilən məlumata görə, məqalədə bildirilir ki, Asiya ilə Avropanın qovuşuğunda, Qafqazın mərkəzində yerləşən Azərbaycan min illik tarixə malik zəngin irsi və paytaxt Bakının müasirliyi ilə insanları təəccübləndirən və hələ də kəşf edilməli olan bir ölkədir.

Məqalədə şəhərin qədim memarlığından bəhs edən müəllif İçəri Şəhər, Şirvanşahlar sarayı, qədim qala divarları və digər tarixi abidələr haqqında məlumat verir. Yazının əsas hissəsi isə Bakının müasir tikililərinə həsr olunmuşdur. Bu xüsusda “Alov qüllələri” kompleksi, Heydər Əliyev Mərkəzi, Bayraq Meydanı, Crystal Hall, yeni Xalça Muzeyinin binası barədə məlumat verilir. Diqqəti xüsusilə “Alov qüllələri”nə yönəldən müəllif yazır: “Bakı şəhəri Doha və ya Abu-Dabi kimi şəhərlərin kölgəsində qalmayacaq əsrarəngiz binalar ucaltmaqla turizmi inkişaf etdirmək yarışına qoşulmuşdur. Bu xüsusda, şəhərin ən məşhur tikinti kompleksi olan və Azərbaycanın “Odlar Yurdu” adını tərənnüm edən “Alov qüllələri” xüsusilə diqqəti cəlb edir”. “Alov qüllələri”ni 2012-ci ildə Bakıda keçirilən “Eurovision” musiqi yarışmasının səfirləri adlandıran müəllif həmin müsabiqəyə ev sahibliyi edən Bakının turizm məkanı kimi özünü təqdim etdiyini yazır. 

Bakıda son illərdə açılmış brend otellərdən bəhs edən müəllif bunun səbəbini yalnız turizmlə deyil, əsas etibarilə, Azərbaycanın daim işgüzar səfərlərin əsas istiqamətlərdən birinə çevirməsi ilə əlaqələndirmişdir.

Şəhərin işıqlandırılmasını Bakının ən cəlbedici tərəflərindən biri kimi xarakterizə edən müəllif bildirir ki, bəzi beynəlxalq turizm bələdçilərinin təsnifatına görə Bakı bütün dünyada gecə vaxtı ən gözəl on şəhərdən biridir.

Birinci “neft bumu” dövründə polyak, italyan və fransız memarları tərəfindən Bakıda inşa olunmuş binalar, Dənizkənarı Milli Park və digər görməli məkanlardan söz açan müəllif 2015-ci ildə Bakıda Avropa Oyunlarının keçiriləcəyi vaxt həmin yerləri görməyi tövsiyə edir.

  Məqalədə Bakının müxtəlif mənzərələrinin, o cümlədən Heydər Əliyev Mərkəzi, “Alov qüllələri”, Crystal Hall, İçəri Şəhər və Qız Qalasının fotoşəkilləri də yer almışdır.