MƏDƏNİYYƏT
Arxeoloji turizmdə qlobal trendlər və uğurlu inkişaf modelləri mövzusunda müzakirə aparılır
![](/files/galleryphoto/2024/2/1200x630/17164730422744558404_1200x630.jpg)
![](/files/galleryphoto/2024/2/1200x630/17164730421723139735_1200x630.jpg)
![](/files/galleryphoto/2024/2/1200x630/17164730421336040980_1200x630.jpg)
![](/files/galleryphoto/2024/2/1200x630/171647304231705013_1200x630.jpg)
![](/files/galleryphoto/2024/2/1200x630/1716473042985219853_1200x630.jpg)
![](/files/galleryphoto/2024/2/1200x630/17164730421162220685_1200x630.jpg)
![](/files/galleryphoto/2024/2/1200x630/17164730421518725313_1200x630.jpg)
![](/files/galleryphoto/2024/2/1200x630/17164730423089160213_1200x630.jpg)
![](/files/galleryphoto/2024/2/1200x630/171647304253960462_1200x630.jpg)
Bakı, 23 may, AZƏRTAC
Mayın 23-də Dövlət Turizm Agentliyi tərəfindən AMEA-nın Arxeologiya və Antropologiya Institutunun tərəfdaşlığı ilə “Atəşgah məbədi” Dövlət Tarix-Memarlıq Qoruğunda “Arxeoloji turizm və dayanıqlı idarəetmə” mövzusunda keçirilən beynəlxalq konfrans panel sessiyalarla davam edib.
AZƏRTAC xəbər verir ki, “Arxeoloji turizmdə qlobal trendlər və uğurlu inkişaf modelləri” adlı sessiyada UNESCO yanında Mədəni İrsdə Arxeologiya Etikası və Praktikası üzrə sədr, Böyük Britaniyanın Arxeologiya departamentinə Beynəlxalq Mədəni İrsin İdarə Edilməsi üzrə MA Proqramının həmdirektoru Robin Koninqham, ABŞ-ın “Kolonial Villiamsburq” fondunun tarixi araşdırmalar bölməsinin direktoru, EXARC (Arxeoloji Açıq Hava Muzeylərinin Beynəlxalq Assosiasiyası) sədri Peter İnker, Almaniyanın “Museumsdorf Düppel – Stiftunq Stadtmuseum Berlin” orta əsrlər arxeoloji açıq səma muzeyinin kuratoru Julia Heeb fərqli mövzularda məruzələrlə çıxış ediblər.
Bundan əlavə, Azərbaycanın zəngin arxeoloji irsi və arxeoloji turizm perspektivlərinə həsr edilmiş sessiyada azərbaycanlı alimlər Qarabağda Pleistosen dövrünə aid olan arxeoloji abidələr, o cümlədən Azıx və Tağlar mağaraları, Füzuli rayonu ərazisində “Kurqanlar və nekropollar barədə təqdimatlar keçirilib.
Konfrans çərçivəsində “Atəşgah məbədi” Dövlət Tarix-Memarlıq Qoruğunun ərazisində açıq havada “Eksperimental arxeologiya” mövzusunda sərgi-ekspozisiya da təşkil olunub. Burada qoruğun ziyarətçiləri və turistlər Paleolit dövrünə aid çadırı seyr edərək, ibtidai insanların müxtəlif məşğuliyyətlərini əyani surətdə izləmək, daş, buynuz, ağac və s. materiallardan əmək alətlərinin hazırlanması, od əldə edilməsi yollarını təcrübədən keçirə biliblər. İştirakçılar həmçinin oxatma yarışlarında, divar rəsmlərinin çəkilməsində iştirak ediblər, dulusçuluq ustalarının işi ilə tanış olmaqla keramikadan müxtəlif əşyalar hazırlayıblar.
Qeyd edək ki, konfrans çərçivəsində tədbir iştirakçıları Qəbələ Arxeoloji Mərkəzini ziyarət ediblər, həmçinin Çuxur Qəbələ, Səlbir və Qala əraziləri ilə tanış olublar. SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının sədri, biologiya üzrə fəlsəfə doktoru Ruhəngiz Heydərova qonaqları Qafqaz Albaniyasının paytaxtı olmuş Qəbələnin tarixi barədə maraqlı faktlarla tanış edib.
Tədbirdə ABŞ, Böyük Britaniya, İtaliya, İsrail, Almaniya, Türkiyə və digər ölkələrdən 15-ə yaxın ekspert iştirak edir. Dünyanın aparıcı arxeoloji parklarının rəhbərləri və İCOMOS kimi beynəlxalq təşkilatların nümayəndələrinin qatıldığı bu konfransda iki gün ərzində 20-dən artıq məruzə təqdim ediləcək.