Bakı, 9 iyun, AZƏRTAC

İyunun 9-da Auditorlar Palatasında “Auditdə kadr problemi” mövzusunda onlayn dəyirmi masa təşkil edilib.

Palatadan AZƏRTAC-a bildiriblər ki, tədbiri Azərbaycan Respublikası Auditorlar Palatasının sədri Vahid Novruzov açaraq kadr hazırlığı sahəsində görülmüş işlər, mövcud olan problemlər və qarşıya qoyulan məsələlərdən bəhs edib.

V.Novruzov kadr hazırlığı sahəsində korrupsiya, ƏL/TM (cinayət yolu ilə əldə edilmiş əmlakın leqallaşdırılması və terrorçuluğun maliyyələşdirilməsi) və kölgə iqtisadiyyatına qarşı mübarizədə auditorların öhdəliklərinə həsr olunmuş tematik kursların, treninq və praktik məşğələlərin, seminar və dəyirmi masaların təşkil edildiyini, rəqəmsal iqtisadiyyat və innovasiyaların tətbiqi sahəsində auditorların ixtisas səviyyələrinin yüksəldildiyini, təcrübəli auditorlar tərəfindən ustad dərslərinin təşkil edildiyini bildirib.

Auditorlar Palatasının sədri, eyni zamanda, ali təhsil müəssisələri ilə fəal əməkdaşlığa nail olmaqla, gənclərin auditor peşəsinə daha geniş cəlb olunmalarının təmin edilməsinin, kadr hazırlığının bütün mərhələlərini əhatə edən vahid koordinasiya sisteminin yaradılmasının, innovasiyalı, rəqəmsal və dayanıqlı iqtisadi inkişafa töhfəsini verəcək beynəlxalq sertifikatlı auditorların hazırlanmasının, auditor kadrlarının hazırlığı və yenidən hazırlanması ilə məşğul olan müəllimlərin seçim prosedurlarının təkmilləşdirilməsinin, ənənəvi maliyyə hesabatlılığı auditindən fərqli əlaqəli auditor xidmətləri və qeyri-maliyyə hesabatlarının auditi üzrə mütəxəssislərin yetişdirilməsinin, habelə ixtisasartırma kurslarının təşkilinin IFAC-ın Beynəlxalq Təhsil Standartlarının tələblərinə uyğun həyata keçirilməsinə nail olunmasının, yeni növ əlaqəli auditor xidmətləri üzrə tədris proqramlarının hazırlanmasının və tətbiqinin vacibliyini vurğulayıb.

Daha sonra Auditorlar Palatası sədrinin elmi-metodik məsələlər üzrə müşaviri Nəcəf Talıbov əsas məruzəçi kimi “Auditdə kadr problemi” barədə geniş məruzə ilə çıxış edib.

Bildirib ki, Azərbaycanda auditor kadrlarının və onların ixtisas səviyyələrinin yüksəldilməsi üzrə beynəlxalq təcrübə nəzərə alınmaqla müasir sistem yaradılmış və fəaliyyət göstərməkdədir. Bu sistemə mühasibat uçotu və audit üzrə ali təhsilli mütəxəssislərin hazırlanması, auditor adı almaq üçün müraciət edən şəxslərin bilik səviyyələrinin müəyyənləşdirilməsi üzrə ixtisas imtahanlarının keçirilməsi və auditorların ixtisasartırma səviyyəsinin yüksəldilməsi üzrə hər il keçirilən ixtisasartırma kursları daxildir.

Müntəzəm olaraq 2012-2022-ci illər ərzində “Auditor təşkilatlarının əməkdaşları (assistentlər və mütəxəssislər) üçün ixtisasartırma kursları”, “Daxili audit”, “Auditorların ixtisasartırma kursları”, “Maliyyə hesabatlarının hazırlanmasına dair ixtisasartırma kursları” təşkil edilib.

Azərbaycanda auditin inkişafını şərtləndirən əsas amillərdən biri yüksək səviyyəli auditor kadrlarının hazırlanması və onların peşə-ixtisas səviyyəsinin artırılmasıdır.

Auditorlar Palatası tərəfindən təşkil edilən ixtisasartırma kursları daimi, icbari və davamlı xüsusiyyətlə nəzəri və praktik istiqamət daşımalıdır. Nəzəri istiqamətdə təşkil olunan kurslar ölkədə audit, maliyyə-mühasibat, iqtisadi qanunvericilik sahəsində baş vermiş dəyişiklikləri, audit və mühasibat uçotu üzrə beynəlxalq və milli standartları, normativ sənədləri, yeni informasiya texnologiyalarından və proqramlardan istifadə olunmasını və digər məsələləri əhatə etməlidir. Praktik ixtisasartırma kursları isə yeni, qabaqcıl iş təcrübəsinin öyrənilməsi, beynəlxalq audit praktikasının mütərəqqi üsullarından istifadə olunması istiqamətlərini əks etdirməlidir.

Auditin və mühasibat uçotunun inkişafını zəruri edən amillərdən biri də rəqəmsallaşma nəticəsində əsas resursun maddi deyil, intellektual aktivlər olduğu iqtisadiyyata keçiddir. Məhz bu şəraitdə müəssisənin inteqrasiya olunmuş hesabatlılığa keçməsi zərurəti yaranır. Çünki ənənəvi maliyyə hesabatları məhsulların (işlərin, xidmətlərin) dəyərinin yaradılmasında əsas amilləri tam əks etdirmir.

Auditin inkişafı və auditor fəaliyyətinə ictimai marağın yüksəldilməsi auditorların hazırlanması və attestasiyası sisteminin təkmilləşdirilməsini, onların ixtisasartırma prosesinin fasiləsizliyini və çevikliyini təmin etməyi tələb edir.

Klassik audit sisteminin formalaşdırılması və auditor peşəsini seçən gənclərin bu fəaliyyətə cəlb edilməsi üçün kadr hazırlığının bütün mərhələlərini əhatə edən vahid koordinasiya sistemini reallaşdırmaq məqsədilə Auditorlar Palatasının Tədris Mərkəzi yaradılmalıdır.

Bəzi mütəxəssislər təklif edir ki, auditor peşəsinə əsas iqtisadi deyil, texniki təhsili olan namizədlərin cəlb edilməsinə üstünlük verilsin. İnkişafa belə bir baxışın əsaslandırılması üçün böyük şansı var, çünki təkcə maliyyə məsələlərində deyil ekspertiza, həm də tərəqqi perspektivlərinin, müasir texnologiyaların, risklərin və imkanların qiymətləndirilməsi və idarə olunması haqqında anlayışın əldə edilməsi də vacibdir. Bu halda qabaqcıl kompüter bilikləri maliyyə sektorunda çalışan istənilən işçi üçün əsas və zəruri hesab olunur.

Bu fikirlər bir-birini tamamlayır, çünki informasiya texnologiyalarının inkişafı İT sənayesi işçiləri olmadan mümkün deyil. Bu, mühasibat uçotu və auditin keyfiyyətcə yeni səviyyəyə çıxmasına imkan verəcək.

Mövzu ətrafında, eyni zamanda Azərbaycan Dövlət İqtisad Universitetinin (UNEC) “Maliyyə və audit” kafedrasının müdiri, iqtisad elmləri doktoru, professor Əvəz Ələkbərov, Daxili Auditorlar İnstitutunun Azərbaycan bölməsinin vitse-prezidenti Fuad Kələşli, Azərbaycan Kooperasiya Universitetinin İnsan resursları departamentinin rəhbəri Zakir Nazıyev, Azərbaycan Dövlət Neft və Sənaye Universitetinin “İqtisadiyyat və menecment” fakültəsinin dekanı, dosent İlham Rüstəmov, “Azəruçot” MMC-nin direktor-auditoru Eldar Təhməzov, Sərbəst auditor Nazim Axundov, “A Audit and Consulting” MMC-nin direktor-auditoru Rüfət Əliyev, “Barattson” şirkətinin nümayəndəsi Pünhan Gəraylı, Bakı Biznes Universitetinin “Mühasibat uçotu və audit” kafedrasının müdiri, iqtisad elmləri üzrə fəlsəfə doktoru Ayətulla Cabbarov və Azərbaycan Memarlıq və İnşaat Universitetinin “Biznesin iqtisadiyyatı və menecment” kafedrasının müdiri, professor Məhəbbət Məmmədov çıxış edərək kadr hazırlığı məsələsinin əhəmiyyətindən, qarşıda duran problemlərdən bəhs etdilər.

Sonda V.Novruzov auditor və mühasib peşələrinin imicinin yüksəldilməsinin, auditor peşəsinə marağın artmasının, kadrların hazırlanmasının təkmilləşdirilməsinin Auditorlar Palatasının qarşısında duran əsas məsələlər olduğunu qeyd edərək dəyirmi masa iştirakçılarına tədbirə qoşulduqlarına görə öz təşəkkürünü bildirdi.