Avqust ayında atmosfer havasını çirkləndirən 1160 avtomobilin sürücüsü cərimələnmişdir
Bakı, 23 sentyabr (AZƏRTAC). Ekologiya və Təbii Sərvətlər Nazirliyinin ərazi ekologiya və təbii sərvətlər şöbələri Daxili İşlər Nazirliyinin Baş Dövlət Yol Polisi İdarəsinin yerli qurumları ilə birlikdə avqust ayında respublika ərazisində “Təmiz hava” aylığı çərçivəsində tədbirlər keçirmişdir.
Nazirliyin mətbuat xidmətindən AZƏRTAC-a bildirmişlər ki, tədbirlər zamanı nəqliyyat vasitələrindən havaya buraxılan dəm qazının normalara uyğun olub-olmaması yoxlanılmışdır.
Yoxlamaya cəlb olunmuş 67 avtomobildən 8-də atmosfer havasına atılan zərərli maddələrin miqdarının dəfələrlə normadan artıq olduğu müəyyənləşdirilmiş, 26 müəssisəyə 1287 manat məbləğində ödəmə tətbiq olunmuşdur. Paytaxt küçələrində və magistral yollarda keçirilən reydlər zamanı isə 2 min 200 avtomobildən 140-da atmosferə atılan zərərli maddələrin miqdarı normadan artıq olmuşdur. Həmin avtomobillərin sürücülərinə qarşı inzibati qaydada tədbir görülmüşdür.
Magistral yollarda keçirilən reydlər zamanı, ümumilikdə, fərdi qaydada 6 min 438 avtomobil yoxlanılmışdır. Atmosfer havasını çirkləndirən 1160 avtomobilin sürücüsünə isə Dövlət Yol Polisi İdarəsinin əməkdaşları tərəfindən inzibati qaydada protokollar tərtib edilmişdir.
Bölmənin digər xəbərləri
