Avstraliyanın Baş naziri Avropa İttifaqı ilə ticari razılaşma barədə danışıqları alqışlayıb
Tokio, 23 may, AZƏRTAC
Avstraliyanın Baş naziri Malkolm Ternbull Avropa İttifaqının (Aİ) onun ölkəsi ilə azad ticarət barədə danışıqları başlamaq barədə qərarını alqışladığını bildirib.
AZƏRTAC xəbər verir ki, M.Ternbull bu barədə bəyanatla mayın 23-də Kanberrada çıxış edib.
“Dünyanın bir çox regionlarında proteksionizmin dəstək aldığı belə bir vaxtda çoxtərəfli razılaşmanın bağlanması böyük uğur hesab edilə bilər”, - deyə Baş nazir vurğulayıb. M.Ternbull qeyd edib ki, Aİ ilə danışıqlar tezliklə başlayacaq və bu, ilk növbədə Avropa bazarına böyük məhdudiyyətlə çıxış əldə edən Avstraliya fermerləri üçün çox mühüm fayda verəcək.
Avstraliyanın ticarət naziri Stiven Çobo isə jurnalistlərlə söhbəti zamanı bildirib ki, qarşıda gözlənilən danışıqların operativliyi üstünlük təşkil etsə də, onun tezliklə əldə edilməsi üçün “gələcək razılaşmanın keyfiyyəti sürətə qurban verilməyəcək”.
Xatırladaq ki, mayın 22-də Aİ Şurası Avropa Komissiyasına Avstraliya və Yeni Zelandiya ilə ticari danışıqlara başlamaq və hər iki ölkə ilə danışıqların strategiyasını müəyyənləşdirmək barədə icazə verildiyini elan edib.
Bəyanatda qeyd edilir ki, Aİ hazırda Avstraliyanın üçüncü, Yeni Zelandiyanın isə ikinci ən böyük ticari tərəfdaşıdır. Bu ölkələrlə ikitərəfli ticarətin ümumi həcmi Avstraliya ilə 47,7 milyard avro, Yeni Zelandiya ilə isə 8,7 milyard avro təşkil edir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
