DÜNYA
Avtomobil qəzasına uğrayan Polşanın Baş naziri ciddi xəsarət almayıb
Bakı, 11 fevral, AZƏRTAC
Fevralın 10-da Osvensimdə avtomobil qəzasına uğrayan Polşanın Baş naziri Beata Şidlo ciddi xəsarətlər almayıb. Bunu Nazirlər Kabinetinin mətbuat katibi Rafal Bohenek brifinqdə bildirib.
AZƏRTAC TASS informasiya agentliyinə istinadla xəbər verir ki, mətbuat katibinin dediyinə görə, Baş nazir insidentdən sonra təcili surətdə Osvensim xəstəxanasına göndərilib və burada diaqnostik müayinədən keçib. Sonradan Beata Şidlo həkimlərin məsləhəti ilə Varşavadakı hospitala yerləşdirilib. Hazırda o, özünü yaxşı hiss edir və Baş nazir səlahiyyətlərini icra etmək iqtidarındadır. Buna baxmayaraq, bir müddət həkimlərin nəzarəti altında qalacaq. Beata Şidlonun fevralın 14-də hökumətin iclasına sədrlik edə biləcəyi isə hələlik məlum deyil.
Bohenek, həmçinin qəza nəticəsində daha iki nəfərin xəsarət aldığını təsdiqləyib. Onlardan biri Baş nazirin avtomobilinin sürücüsü, digəri isə daha ciddi xəsarət alan və Varşavada xəstəxanada müalicəsini davam etdirən mühafizəçidir.
Bu arada hakim Hüquq və Ədalət Partiyasının başçısı Yaroslav Kaçinski Baş nazirin “ciddi xəsarət aldığını” və fevralın 10-da axşam saatlarında helikopterlə Varşavaya çatdırıldığını bildirib.
Xatırladaq ki, yol-nəqliyyat hadisəsi fevralın 10-da yerli vaxtla saat 18:30-da baş verib. İşıq və səs siqnallarının qoşulduğu üç maşından ibarət kortej qarşıdakı “Fiat” avtomobilini ötməyə çalışıb. “Fiat”ın sürücüsü birinci maşını buraxdıqdan sonra sükanı döndərərkən Polşa hökuməti başçısının əyləşdiyi ikinci avtomobillə toqquşub. Hökumət avtomobilinin sürücüsü qəzadan yayınmağa çalışaraq sola dönüb və yol kənarındakı ağaca çırpılıb.