Fərid Qayıbov: Sevindirici haldır ki, üzgüçülük yarışında müxtəlif yaşda olan insanlara rast gəlinir
Bakı, 2 iyun, AZƏRTAC
Bu yarış ikinci dəfə keçirilir. Birincidən fərqli olaraq, bu dəfə digər türk ölkələrindən olan idmançılar da iştirak edirlər.
AZƏRTAC xəbər verir ki, bu sözləri gənclər və idman naziri Fərid Qayıbov Bakıda ikinci dəfə keçirilən “Üzgüçülük hamı üçün” layihəsinin açılış mərasimindən sonra jurnalistlərə müsahibəsində deyib.
Nazir bildirib ki, gələcəkdə bu yarışda iştirak edəcək ölkələrin sayında artım olacaq: “Üzgüçülük hamı üçün” layihəsində müxtəlif yaş kateqoriyasından olan idmançılar iştirak edirlər. Bu da sevindirici məqamdır. Çünki insanların sağlamlığı baxımından çox önəm kəsb edir”.
Onun sözlərinə görə, idmanda kütləviliyin artırılması üçün müxtəlif layihələr həyata keçirilir: “Artıq orta məktəblərdə üzgüçülük idman növünə maraq oyatmaq üçün məşqçilər tərəfindən seçim işləri aparılır. Orada özünü göstərən uşaqlar gələcəkdə əsas yarışlara qatılırlar. Məqsəd gəncləri idmana cəlb etməkdir”.
Yarışda Azərbaycanla yanaşı, Türkiyə, Qazaxıstan və Şimali Kipr Türk Respublikası ölkələrindən müxtəlif yaş kateqoriyasında olan idmançılar iştirak edirlər.
Bölmənin digər xəbərləri
