SİYASƏT
Aygün Attar: İqtisadi konsolidasiya türk dövlətlərinin əməkdaşlığının rəhnidir
![](/files/galleryphoto/2024/2/1200x630/17164799115628915278_1200x630.jpg)
![](/files/galleryphoto/2024/2/1200x630/17164799114769116295_1200x630.jpg)
Ankara, 24 may, AZƏRTAC
2009-cu il Naxçıvan Bəyannaməsində təsbit edilmiş türk dövlətləri arasında əməkdaşlığın əsasları ölkələrimiz arasında, o cümlədən iqtisadi sahədə qarşılıqlı fəaliyyət üçün güclü zəmin təşkil edib. Bu məsələdə Türk Dövlətləri Təşkilatına (TDT) üzv ölkələrin rəhbərləri tərəfindən təsdiq olunmuş “Türk dünyasının 2040-cı ilədək vizyonu” konsepsiyası xüsusi əhəmiyyət kəsb edir.
AZƏRTAC xəbər verir ki, bu sözləri Türkiyə-Azərbaycan Dostluq, Əməkdaşlıq və Həmrəylik Fondunun sədri, Türkiyə Prezidenti yanında Təhlükəsizlik və Xarici Siyasət Şurasının üzvü, professor Aygün Attar Ankarada keçirilən “Türk dövlətlərinin diplomatik nümayəndəliklərinin görüşü” adlı tədbirdəki çıxışında deyib.
A.Attarın fikrincə, vahid valyutanın dövriyyəyə buraxılması türk dövlətləri arasında perspektivli müzakirə mövzusu ola bilər.
Professor əlavə edib: “İqtisadi əməkdaşlıq məsələsində mühüm addım Türk dünyasının inteqrasiyası istiqamətində ilk birgə maliyyə institutu - Türk İnvestisiya Fondunun yaradılması oldu. Bundan əlavə, Türkiyə də daxil olmaqla, TDT-nin bütün üzv ölkələrində xidmətlərin göstərilməsinə yönəlmiş “Turan” maliyyə tətbiqi layihəsinin həyata keçirilməsi vacibdir”.
Türkiyə Prezidenti yanında Təhlükəsizlik və Xarici Siyasət Şurasının üzvü Orta Dəhlizin türk xalqlarının rifahının yüksəldilməsinə töhfə verəcəyini qeyd edib. O vurğulayıb: “Müasir İpək Yolu da adlandırılan Orta Dəhliz Şimal və Cənub ticarət marşrutlarından daha sərfəli və qısadır. Bütün bunlar ölkələrimiz üçün yeni imkanlar açır”.
Professorun sözlərinə görə, Türk dünyası artıq qarşılıqlı ticarət dövriyyəsində ciddi artım yaşayır. “Əgər 2022-ci ilin sonunda türk dövlətləri arasında ticarət dövriyyəsi ümumilikdə 33 milyard dollar təşkil edirdisə, 2023-cü ilin sonunda bu rəqəm 42 milyard dollara çatıb”, -deyə A.Attar məlumat verib.
Türkiyə-Azərbaycan Dostluq, Əməkdaşlıq və Həmrəylik Fondunun sədri Zəngəzur dəhlizinin türk ölkələrinin iqtisadi əlaqələrinin möhkəmləndirilməsində əhəmiyyətindən də danışıb. “Zəngəzur dəhlizi, ilk növbədə, dəmir yolu ilə yükdaşımaların həcmini artıracaq və dünya ticarətinə təkan verəcək”, - deyə o qeyd edib.
Türkiyənin Sənaye və Ticarət Mərkəzi (OSTİM) tərəfindən təşkil olunmuş müzakirələrdə Azərbaycan, Qazaxıstan, Qırğızıstan və Şimali Kipr Türk Respublikasının diplomatik missiyalarının nümayəndələri, müxtəlif ölkələrin ticarət nümayəndələri, Macarıstanın İxracatın İnkişafı Agentliyinin (NERA) təmsilçiləri və başqaları iştirak ediblər.
Ramin Abdullayev
AZƏRTAC-ın xüsusi müxbiri
Ankara