“AzCon Ltd” ŞİRKƏTİ TİKİNTİ İŞLƏRİNƏ NƏZARƏT EDİR
Şirkətin baş mühəndisi Kamal Rüstəmov AZƏRTAC-ın müxbirinə demişdir ki, biz Bakıda inşa olunan çoxmərtəbəli binaların düzgün tikilib qaldırılması vəziyyətini hər iki mərtəbədən bir yoxlayıb nəzarətdə saxlayırıq. Son vaxtlar şəhərdə söhbət gəzir ki, binaların tikintisində haradasa əyriliklər vardır. Məhz buna görə də inşaat şirkətləri bizə müraciət edirlər. Hələlik müqaviləyə görə “Fərəh” şirkətinin tikintilərinə nəzarət edirik.
Bununla yanaşı, şirkət Naxçıvan MR-də Möminə xatın və Qarabağlar türbələrinin bərpası çərçivəsində dəqiq geodeziya ölçüləri aparmışdır. Sumqayıt Səthi aktiv maddələr zavodunda geodeziya işlərini may ayının axırında təhvil verəcəkdir. “Azərkörpü” şirkətinin subpodrat işlərini, Tarixi İpək yolunun layihəsi ilə əlaqədar Ələt-Salyan, Astara-Ələt yollarında, Biləcəri dairəsi yolunda, Fransanın “Texnip” şirkəti ilə “Zıx-4” obyektində mühəndis-geodeziya, nəzarət, topoqrafiya, ölçmə, axtarış, planalma işlərini aparır. Belə mühüm obyektlərdə çalışmaq üçün şirkət gələcəkdə müsabiqələrdə iştirak edəcəkdir.
Bölmənin digər xəbərləri
