AZƏRBAYCAN ARTİSTLƏRİNİN UĞURLU QASTROLLARI
“Şərq bülbülləri” muğam üçlüyü Cənubi Koreyada keçirilmiş beynəlxalq musiqi festivalında iştirak etmişdir. Azərbaycanın əməkdar artistləri- tarzən Zamiq Əliyev, xanəndə Simarə İmanova və kamança çalan Mirnazim Əsədullayev ölkənin paytaxtı Seulda, habelə İnçxon, Kvancu şəhərlərində muğam, təsnif və xalq mahnılarından ibarət 6 konsert vermişlər. Zamiq Əliyev AZƏRTAC-ın müxbirinə bildirmişdir ki, konsertlərin birində “Pəncərədən daş gəlir” xalq mahnısının ifası zamanı Azərbaycan musiqisinin melodikliyinə heyran qalan dinləyicilər artistlərə qoşulmuşlar.
Muğam üçlüyü bu ilin sonunda Seulda keçiriləcək musiqi festivalına dəvət almışdır.
Üçlük Cənubi Koreyadan qayıdarkən ölkəmizin Özbəkistandakı səfirliyinin təşəbbüsü ilə Daşkənddə Milli Qurtuluş gününə həsr olunmuş konsert vermişlər. Azərbaycan diasporunun nümayəndələrindən, Şərq musiqisi həvəskarlarından ibarət 2100 dinləyicinin iştirak etdiyi konsertdən yığılan vəsait Özbəkistanda Azərbaycan mədəniyyət mərkəzinin yaradılmasına sərf olunacaqdır. Hər bir ifadan sonra gurlayan sürəkli alqışlar bir daha sübut etdi ki, bu üçlük 1997-ci ildə Səmərqənddə keçirilmiş “Şərq melodiyaları” festivalında qazandığı Qran-pri mükafatına tamamilə layiqdir.
Bölmənin digər xəbərləri
