Azərbaycan-Avstriya Əməkdaşlıq Şurasının Məşvərət Heyətinin təsis iclası keçirilib
Vyana, 29 mart, AZƏRTAC
Martın 29-da Vyanada Azərbaycan-Avstriya Əməkdaşlıq Şurasının Məşvərət Heyətinin təsis iclası keçirilib.
AZƏRTAC xəbər verir ki, iclasda Məşvərət Heyətinin həmsədri, Azərbaycanın nəqliyyat, rabitə və yüksək texnologiyalar naziri Ramin Quluzadə çıxış edib. Qeyd edilib ki, Azərbaycan və Avstriya arasında iqtisadi əlaqələr yüksələn xətlə inkişaf edir, ötən il Vyanada hökumətlərarası komissiyanın iclası keçirilib. Yeni yaradılan Şura və onun Məşvərət Heyəti gələcəkdə həm iqtisadi, həm də digər sahələrdə əlaqələrin inkişafına böyük töhfə verəcək.
Avstriyanın federal vitse-kansleri Haynts-Kristian Ştraxe keçən il Bakıya baş tutan səfərini xatırladaraq, Azərbaycan-Avstriya Əməkdaşlıq Şurasının yaradılması təşəbbüsünə göstərdiyi dəstəyə görə Azərbaycan Prezidenti İlham Əliyevə minnətdarlığını ifadə edib. Bildirilib ki, ötən ilin payızında təsis edilən Əməkdaşlıq Şurası işgüzar dairələr arasında əlaqələrin dərinləşməsində vacib rol oynayacaq və hökumət üzvlərindən ibarət Məşvərət Heyəti bu istiqamətdə mühüm töhfələr verəcək.
Kənd təsərrüfatı naziri İnam Kərimov rəhbərlik etdiyi qurumun Azərbaycanda aqrar sahənin inkişafı məqsədilə nəzərdə tutulan hədəf istiqamətləri barədə məlumat verib. Qeyd edilib ki, qeyri-neft sektorunun inkişafı Azərbaycanda prioritet istiqamətdir, ölkənin ixrac potensialının artırılmasında kənd təsərrüfatı məhsulları mühüm rol oynayır. Nazir, həmçinin aqrar sektorda qarşılıqlı maraq doğuran layihələrə toxunub.
Xarici işlər nazirinin müavini Mahmud Məmməd-Quliyev Məşvərət Heyətinin iqtisadi məsələlərlə yanaşı, humanitar və sosial sahələrdə ölkələr arasında əlaqələrin daha da inkişafına töhfə verəcəyinə ümid etdiyini bildirib. O, həmçinin hər iki ölkənin Avropa Şurasına üzv dövlətlər olduğunu xatırladaraq bu təşkilat çərçivəsində əlaqələrin inkişafına ümid bəslədiyini vurğulayıb.
Avstriyanın nəqliyyat, infrastruktur və texnologiyalar üzrə federal naziri Norbert Hofer qeyd edib ki, iqtisadi əlaqələrin inkişafı və işgüzar dairələrin yaxınlaşması ölkələr arasında ikitərəfli münasibətləri inkişaf etdirməklə yanaşı, hər iki ölkədə insanların maddi rifahını yüksəldəcək.
Avstriyanın əmək, sosial məsələlər, səhiyyə və istehlakçıların hüquqlarının müdafiəsi üzrə federal naziri Beate Hartinqer-Klayn səhiyyə və sosial təminat sahəsində mümkün texnologiya transferi, elektron səhiyyə aktı və kadrların hazırlanması sahəsindəki mümkün əməkdaşlıq məsələlərindən bəhs edib.
Avstriya-Azərbaycan Əməkdaşlıq Şurasının həmsədrləri Nəriman Baxişev və Verner Müller çıxışlarında yeni yaradılmış təşkilatın biznes və hökumət strukturları arasında əməkdaşlığa dəstək verəcəyini, hər iki ölkənin iqtisadiyyatı üçün qarşılıqlı maraq doğuran ideyalar əsasında layihələrin həyata keçiriləcəyini bildiriblər.
Sonra Avstriya və Azərbaycan şirkətləri prioritet layihələrlə bağlı təqdimatlar keçiriblər. Təqdimatlarda informasiya və kommunikasiya texnologiyaları, kənd təsərrüfatı, səhiyyə, qida sənayesi, infrastrukturun inkişafı və digər sahələrdə fəaliyyət göstərən şirkətlər öz layihələrini təqdim ediblər, prioritet sahələr üzrə fikir mübadiləsi aparılıb.
Yekunda Məşvərət Heyətinin həmsədrləri bu heyətin təsis edilməsinə dair protokol imzalayıblar.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
