AZƏRBAYCAN-AVSTRİYA İQTİSADİ ƏMƏKDAŞLIĞI
2002-ci il iyunun 3-5-də Bakı şəhərində Azərbaycan Respublikası hökuməti və Avstriya Respublikasının federal hökuməti arasında iqtisadiyyat, kənd təsərrüfatı, sənaye, texnika və texnologiya sahələrində əməkdaşlıq üzrə komissiyanın ikinci iclası keçirilmişdir.
İclasa Azərbaycan tərəfindən Azərbaycan Respublikasının iqtisadi inkişaf naziri, komissiyanın həmsədri Fərhad Əliyev, Avstriya tərəfindən Avstriya Federal İqtisadiyyat və Əmək Nazirliyinin xarici iqtisadi əlaqələr üzrə baş direktoru, komissiyanın həmsədri cənab Yohan Zaks sədrlik etmişlər.
2002-ci il iyunun 5-də komissiyanın həmsədrləri iclasın yekunları barədə protokol imzalamışlar. Sənədin imzalanma mərasimində Azərbaycan tərəfindən komissiyanın üzvləri - iqtisadi inkişaf, xarici işlər, kənd təsərrüfatı, maliyyə, gənclər, idman və turizm nazirliklərinin, Milli Elmlər Akademiyasının, “Azərbaycan hava yolları” Dövlət Konserninin nümayəndələri iştirak edirdilər.
Avstriya tərəfini Avstriyanın Azərbaycandakı səfiri Haydemariya Gürer, ölkənin İqtisadi Palatasının Rusiyada və Azərbaycanda ticarət nümayəndəsi Hans Kausl, İqtisadiyyat və Əmək Nazirliyinin Azərbaycan üzrə referenti Süzana Beşaner və Avstriyanın aparıcı şirkətlərinin nümayəndələri təmsil etmişlər.
Protokol iki ölkə arasında iqtisadi əməkdaşlığın genişləndirilməsi, kənd təsərrüfatı məhsullarının emalı, neft, qaz və kimya sənayesi, neft boruları istehsal edən şirkətlər arasında əməkdaşlıq əlaqələrinin yaradılması, energetika, yeyinti və yüngül sənaye, səhiyyə, turizm, maliyyə, bank və sığorta, mütəxəssislərin ixtisasının artırılması və onların yenidən hazırlanması və s. sahələr üzrə qarşılıqlı əməkdaşlıq məsələlərini əhatə edir.
Tərəflər ölkələr arasında iqtisadi əməkdaşlığın genişləndirilməsinin böyük əhəmiyyət daşıdığını və bunun üçün geniş imkanlar olduğunu qeyd etmiş, Azərbaycandan kənd təsərrüfatı, kimya məhsullarının ixracının, Avstriyadan infrastrukturun inkişafında istifadə olunan avadanlıqların, yeni texnologiyaların, neft, kənd təsərrüfatı avadanlığının, xalq istehlakı mallarının idxalının artırılmasını məqsədəuyğun hesab etmişlər.
İnvestisiya əməkdaşlığının genişləndirilməsi, iki ölkə arasında iqtisadi əlaqələrin, o cümlədən qeyri-neft sektorunda əlaqələrin inkişaf etdirilməsi imkanlarının öyrənilməsi məqsədi ilə hər iki ölkənin özəl sektoru nümayəndələrinin iştirakı ilə müxtəlif konfransların, təqdimatların, seminarların və digər tədbirlərin keçirilməsinin vacibliyi qeyd olunmuşdur.
Azərbaycan tərəfi ikitərəfli əməkdaşlıq çərçivəsində dövlət qulluqçuları və menecerlərinin hazırlanması sahəsində Avstriya tərəfinin apardığı səmərəli işi yüksək qiymətləndirmişdir. Avstriya tərəfi cari ilin payızında 8 dövlət qulluqçusu üçün seminar keçiriləcəyini bildirmişdir. Tərəflər arasında bu ilin noyabr ayında Avstriyanın paytaxtı Vyana şəhərində Azərbaycan müəssisələrinin istehsal imkanlarının, onların məhsullarının sərgisinin keçirilməsi barədə razılıq əldə olunmuşdur.
Komissiyanın iclasında yekun sözü ilə çıxış edən iqtisadi inkişaf naziri F.Əliyev Azərbaycan tərəfinin Avstriya investisiyalarının ölkə iqtisadiyyatının prioritet sahələrinə cəlb edilməsinə maraq göstərdiyini vurğulamış və Avstriya şirkətlərini Azərbaycanda gedən özəlləşdirmə prosesində fəal iştirak etməyə dəvət etmişdir.
İqtisadi İnkişaf Nazirliyinin
mətbuat xidməti
Bölmənin digər xəbərləri
