Azərbaycan diplomatiyası qarşısında məğlub olan Fransa qisas üçün müxtəlif yollara əl atır ŞƏRH
Bakı, 25 may, AZƏRTAC
Azərbaycan dövləti və diplomatiyası qarşısında məğlub olan Fransa qisas almaq üçün müxtəlif yollara əl atır. Erməni separatizminə siyasi, maddi və hərbi dəstək verməklə regionda qalacağına ümid edən, ölkəmizə təsir etmək üçün yeni mexanizmlər yaratmaq istəyən Parisin planları dövlətimiz tərəfindən alt-üst edildi. Afrikada, Yaxın Şərqdə, dənizaşırı regionlarda vəhşiliklər törədən, Əlcəzairdə, Ruandada, Livanda, Konqoda, Nigerdə və digər ölkələrdə soyqırımları həyata keçirən Fransa Azərbaycanın ermənilərə qarşı “soyqırımı” törədir yalanı ilə dəfələrlə beynəlxalq təşkilatlara müraciət edib. Lakin hər dəfə də Azərbaycan tərəfindən qurulmuş sistemli beynəlxalq münasibətlər nəticəsində fiaskoya uğradılıb.
Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
O bildirib ki, Fransa BMT Təhlükəsizlik Şurasının 5 daimi üzvündən biri olaraq dünyada sülhün və təhlükəsizliyin təmin olunması öhdəliyini üzərinə götürsə də, günümüzdə neokolonializmi, separatizmi dəstəkləyən ölkədir. Özünü dünyanın demokratik, sivil, bəşəri dəyərlərə sahib ölkəsi kimi göstərən Fransanın hər keçən gün yeni mənfi keyfiyyətləri ortaya çıxır. Törətdiyi bəşəri cinayətlərdən utanmaq, müstəmləkəsi altında olan xalqlara azadlıq vermək əvəzinə həmin xalqlara qarşı silahlı güc tətbiq edir və cinayətləri qarşısında susmayan, onları dünya ictimaiyyətinə çatdıran Azərbaycanla düşmənçilik edir.
“Dünya birliyi tərəfindən Azərbaycanda keçirilməsinə yekdilliklə razılıq verilmiş BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının (COP 29) boykot edilməsi barədə Paris Şəhər Şurası qərar qəbul edib. Əlbəttə ki, belə qərarın heç bir əsası və təsiri olmayacaq. Afrikanın təbii sərvətlərini ekoloji qaydaları pozaraq talayan, meşələri, yaşıllıqları məhv edən, çayları, su hövzələrini çirkləndirən, qeyri-səmərəli istifadə edən, elektrik enerjisinin böyük hissəsini uran, nüvə və digər atmosferə ağır zərbə vuran metalların istifadəsi ilə istehsal edən Fransadan COP29 tədbiri ilə bağlı müsbət addım gözləmək də yersizdir. Belə bir tədbirin ölkəmizdə keçirilməsi haqqında qərarın qəbulu torpaqlarımızı işğaldan azad etdiyimizə görə Fransa və ermənipərəst qüvvələr tərəfindən başladılmış qarayaxma kampaniyasına vurulan böyük zərbə oldu”, - deyə politoloq qeyd edib.
Ölkəmizin dəfələrlə beynəlxalq miqyaslı mötəbər tədbirləri yüksək səviyyədə təşkil etmək bacarığını nümayiş etdirdiyini vurğulayan Y.Hacızadə, həmçinin deyib: “Azərbaycanın belə əhəmiyyətli tədbirləri keçirmək üçün müasir infrastruktura malik olması və təhlükəsizlik baxımından sabit ölkə olması dünya ictimaiyyətinə bəllidir. Prezident İlham Əliyevin rəhbərliyi ilə Azərbaycan dövlətinin apardığı davamlı və uğurlu beynəlxalq siyasət, Avropanın enerji təhlükəsizliyi sahəsində həyata keçirilən fəaliyyət, yaşıl enerjiyə keçidlə bağlı real planlar və qlobal məsələlərin həlində oynanılan rol ölkəmizi dünyada daha güclü aktor kimi tanıdıb.
Fransa rəsmilərinin müxtəlif tədbirlərdə və açıqlamalarında Azərbaycanın COP29 sədrliyini hədəf alan fikirləri artıq gözlənilməz addım deyil. Bundan əvvəl də Fransanın Avropa və Xarici İşlər Nazirliyi Azərbaycanın COP29 sədrliyini hədəfə alıb. Fransa görməli və bilməlidir ki, onlarla dövləti müstəmləkədə saxlayaraq, milyonlarla insanın təməl hüquqlarını pozaraq başqa ölkələri ittiham etmək, onlara qarşı şantaj və təhdid siyasəti aparmaq mümkün deyil. Texnologiyanın belə bir inkişafı şəraitində Fransanın öz cinayətlərini gizlətməsi də qeyri-mümkündür. Eyni zamanda, kolonializm siyasətinə və separatizmə qalib gəlmiş ölkə kimi Azərbaycan Fransanın əməllərini bundan sonra da ifşa edərək dünyanın diqqətinə çatdıracaq”.
Bölmənin digər xəbərləri
