AZƏRBAYCAN İLƏ DST ARASINDA QARŞILIQLI ANLAŞMA MEMORANDUMU İMZALANACAQ
Nazirliyin mətbuat xidmətindən AZƏRTAC-ın müxbirinə bildirmişlər ki, Ümumdünya Assambleyası Dünya Səhiyyə Təşkilatının (DST) qərarlar qəbul edən ali orqanıdır. Onun Cenevrədə keçirilən illik sessiyasında təşkilatın üzvü olan 192 dövlətin nümayəndə heyətləri iştirak edirlər. Assambleyanın başlıca funksiyası təşkilatın fəaliyyətinin öncül istiqamətlərini müəyyənləşdirməkdir. Bu il sessiyada müzakirə olunacaq məsələlər arasında pandemik qripə qarşı cavab tədbirlərinin hazırlanmasının gücləndirilməsi, 2005-ci il beynəlxalq tibb–sanitar qaydalarının tətbiqi; çağaların və azyaşlı uşaqların qidalanması; İÇV/QİÇS; poliomielitin və orağabənzər hüceyrəli anemiyanın aradan qaldırılması; korluğa qarşı profilaktik tədbirlər; beyənlxalq ticarət və sağlamlıq; tütünə qarşı mübarizə, habelə intellektual mülkiyyət məsələləri müzakirə olunacaqdır. Sessiyanın əsas məruzəçisi Uels şahzadəsidir.
Sessiyadan sonra Cenevrədə DST İcraiyyə Komitəsinin 118-ci iclası keçiriləcəkdir. Sessiyada İcraiyyə Komitəsinin yeni üzvləri seçiləcək, ölkəmizdə səhiyyə sahəsində aparılan islahatlara dair məruzə dinləniləcək, Azərbaycan ilə DST arasında qarşılıqlı anlaşma haqqında növbəti ikiillik memorandum imzalanacaqdır.
Bölmənin digər xəbərləri
