Azərbaycan ilə İndoneziya arasında iqtisadi əlaqələrin inkişaf etdirilməsi üçün böyük potensial vardır
Bakı, 18 noyabr (AZƏRTAC). Noyabrın 18-də İndoneziya-Azərbaycan parlamentlərarası dostluq qrupunun üzvləri Milli Məclisdə iqtisadi siyasət komitəsinin üzvləri ilə görüşmüşlər.
AZƏRTAC xəbər verir ki, görüşdə komitə sədri Ziyad Səmədzadə demişdir ki, hər iki ölkənin bütün sahələrdə əməkdaşlıq əlaqələri qurmasına üstünlük verməsi sevindirici haldır. O bildirmişdir ki, bu gün Azərbaycan və İndoneziya arasında münasibətlər sürətlə inkişaf edir.
Azərbaycanda gedən sürətli iqtisadi inkişaf barədə qonaqlara məlumat verən komitə sədri vurğulamışdır ki, 2020-ci ildə adambaşına düşən məhsulun miqdarına görə ölkəmiz dünyanın inkişaf etmiş dövlətləri sırasında olacaqdır. Bunun üçün Azərbaycan Prezidenti tərəfindən xüsusi strateji xətt müəyyən edilmişdir. Həmin strategiyaya əsasən Azərbaycan iqtisadiyyatının neftdən asılılığı ilbəil azalır. Uğurların əsasını isə cəmiyyətin sabitliyi, dinamik iqtisadi inkişaf, beynəlxalq aləmdə milli maraqlara cavab verən əməkdaşlıq təşkil edir.
Azərbaycanda gedən sürətli inkişafın şahidi olduqlarını deyən İndoneziya-Azərbaycan parlamentlərarası dostluq qrupunun rəhbəri Ferrari Roemavi bildirmişdir ki, ölkəsi Azərbaycan ilə bütün sahələrdə əməkdaşlığın genişləndirilməsində maraqlıdır. O, ticari-iqtisadi əlaqələrin inkişaf etdirilməsi üçün hər iki ölkənin böyük potensialı olduğunu diqqətə çatdırılmışdır.
Bölmənin digər xəbərləri
