AZƏRBAYCAN İLƏ NİDERLAND ARASINDA PARLAMENTLƏRARASI ƏLAQƏLƏR GENİŞLƏNİR
AZƏRTAC xəbər verir ki, ölkəmizdə səfərdə olan Niderland Krallığı parlamentinin baş katibi xanım Jaklin Bişevel iyulun 8-də Milli Məclisə gəlmişdir.
Əvvəlcə qonaq parlamentin iclas zalı və Heydər Əliyev xatirə muzeyi ilə tanış olmuşdur. Ulu öndərin fəaliyyətini əks etdirən fotoşəkillər barədə xanım Bişevelə ətraflı məlumat verilmişdir.
Sonra Niderland Krallığı parlamentinin baş katibi Milli Məclis Aparatının rəhbəri Səfa Mirzəyev ilə görüşmüşdür.
S.Mirzəyev qonağa Milli Məclisin fəaliyyəti barədə ətraflı məlumat vermişdir. Bildirilmişdir ki, sovetlər birliyi dövründə Ali Sovet kimi fəaliyyət göstərən qanunverici orqan 1995-ci ildə qəbul olunmuş Konstitusiya əsasında yenidən formalaşmışdır. Milli Məclisə seçkilər əvvəllər majoritar və proporsional sistemlərdə keçirilmişdir. 2002-ci ildə referendum yolu ilə Konstitusiyaya dəyişiklik edildikdən sonra isə deputatlar yalnız majoritar qaydada seçilirlər. Hazırda Milli Məclisin 125 deputatı vardır və parlamentə seçkilər beş ildən bir keçirilir. Parlamentdə 11 siyasi partiya təmsil olunur, deputatların 41 nəfəri isə tam müstəqildir və heç bir siyasi partiyanı təmsil etmir. Parlamentdə 11 daimi və 2 prosedur komissiya fəaliyyət göstərir. Milli Məclisin ildə iki sessiyası - yaz və payız sessiyaları keçirilir.
S.Mirzəyev ölkəmizin seçki qanunvericiliyi, beynəlxalq əməkdaşlıq, eləcə də Azərbaycanda həyata keçirilən hüquq islahatları ilə bağlı tədbirlərdən də söz açmışdır.
Xanım Jaklin Bişevel ətraflı məlumata görə minnətdarlıq etmişdir. Niderland Krallığının parlamenti barədə məlumat verən xanım Bişevel demişdir ki, ölkəsinin qanunverici orqanı Senat və Nümayəndələr Palatasından ibarətdir. Əsas işi isə parlament aparatı və onun şöbələri aparır. Baş katib ölkəsinin seçki təcrübəsindən danışmış, təmsil etdiyi parlamentin beynəlxalq əlaqələri barədə də məlumat vermişdir.
Görüşdə parlamentlərarası əlaqələrin inkişafının vacibliyi vurğulanmış, qarşılıqlı səfərlərin və tədbirlərin təşkili, eləcə də digər məsələlər ətrafında fikir mübadiləsi aparılmışdır.
X X X
Həmin gün xanım Jaklin Bişevel Milli Məclisin beynəlxalq münasibətlər və parlamentlərarası əlaqələr daimi komissiyasının sədri, Azərbaycanın Avropa Şurası Parlament Assambleyasındakı (AŞPA) nümayəndə heyətinin rəhbəri Səməd Seyidov ilə görüşmüşdür.
S.Seyidov rəhbərlik etdiyi komissiyanın, eləcə də AŞPA-dakı nümayəndə heyətimizin fəaliyyəti barədə məlumat vermişdir. Azərbaycan ilə Avropa Şurası arasında əlaqələrin intensiv inkişaf etdiyini vurğulayan S.Seyidov bildirmişdir ki, azərbaycanlı və niderlandlı deputatlar AŞPA-da, eləcə də digər beynəlxalq təşkilatlarda səmərəli əməkdaşlıq edirlər.
Niderland Krallığı parlamentinin baş katibi ölkəsinin qanunverici orqanının fəaliyyətindən danışmış, deputatlarımızın beynəlxalq təşkilatlardakı əməkdaşlığından məmnunluğunu ifadə etmişdir.
Görüşdə Azərbaycan və Niderland parlamentləri arasında dostluq qruplarının fəaliyyətinin gücləndirilməsinin, qarşılıqlı səfərlərin təşkilinin və təcrübə mübadiləsinin vacibliyi xüsusi qeyd olunmuşdur.
Bölmənin digər xəbərləri
