AZƏRBAYCAN İLƏ RUSİYA ARASINDA DÖVLƏT SƏRHƏDİNİN DELİMİTASİYASI ÜZRƏ KOMİSSİYANIN NÖVBƏTİ İCLASI KEÇİRİLMİŞDİR

08.04.2006 [21:13]
Çap et
A⁺ A^-

Xarici İşlər Nazirliyinin mətbuat mərkəzindən AZƏRTAC-a bildirmişlər ki, aprelin 5-7-də Dərbənddə Azərbaycan Respublikası ilə Rusiya Federasiyası Arasında Dövlət Sərhədinin Delimitasiyası üzrə Dövlət Komissiyasının 11-ci birgə iclası keçirilmişdir.

İclasda Azərbaycan xarici işlər nazirinin müavini Xələf Xələfov, Rusiya Xarici İşlər Nazirliyinin xüsusi tapşırıqlar üzrə səfiri Aleksandr Yakovenkonun, Dövlət komissiyalarının üzvləri, əlaqədar qurumların nümayəndələri və ekspertləri, həmçinin sərhəd rayonlarının rəhbərləri iştirak etmişlər.

İclasda razılaşdırılmamış sahələrdə sərhəd xəttinin keçməsi məsələlərinə baxılmış, habelə dövlət sərhədinin delimitasiyası üzrə əlavə normativ-hüquqi sənədlər, torpaq quruluşuna və istifadəsinə aid kartoqrafik materiallar araşdırılmış və müzakirə olunmuşdur. Tərəflər komissiyalar çərçivəsində daha sonra öyrənilməsi və baxılması məqsədi ilə müvafiq sənədləri mübadilə etmişlər.

Bundan əlavə, komissiyaların üzvləri və ekspertləri sərhəd rayonlarının rəhbərləri ilə birlikdə razılaşdırılmamış sahələrdə naturada baxış keçirmişlər. Müzakirələrin nəticələrinə dair müvafiq protokol imzalanmışdır. Dövlət komissiyaları çərçivəsində razılaşdırılmamış sahələrə aid olan materialların araşdırılmasının davam etdirilməsi qərara alınmışdır.

Tərəflər növbəti birgə iclasın Azərbaycanda keçirilməsinə dair razılığa gəlmişlər. İclasın vaxtı diplomatik kanallarla razılaşdırılacaqdır.