AZƏRBAYCAN-LATVİYA HÖKUMƏTLƏRARASI KOMİSSİYASININ İKİNCİ İCLASI KEÇİRİLMİŞDİR

15.07.2008 [21:37]
Çap et
A⁺ A^-

AZƏRTAC xəbər verir ki, iyulun 15-də Riqada Azərbaycanla Latviya arasında iqtisadi, elmi-texniki və mədəni əməkdaşlıq üzrə hökumətlərarası komissiyanın ikinci iclası keçirilmişdir.

İclasda ölkəmizi iqtisadi inkişaf naziri Heydər Babayevin rəhbərlik etdiyi nümayəndə heyəti təmsil etmişdir. Müzakirələrdə iki ölkə arasında ticari, iqtisadi, mədəni və elmi-texniki sahələrdə əməkdaşlığa dair fikir mübadiləsi aparılmışdır. Danışıqlarda enerji sahəsi prioritet mövzulardan biri olmuşdur.

Bildirilmişdir ki, Latviya Azərbaycanla enerji sahəsində əməkdaşlıqda maraqlıdır və hər iki ölkənin ekspertlərinə bu əməkdaşlığın imkanlarını öyrənmək tövsiyə edilmişdir.

İclasın yekunlarına dair protokol imzalanmışdır.

Səfər şərçivəsində Heydər Babayev Latviyanın nəqliyyat və rabitə naziri Aynar Şleserslə də görüşəcəkdir.