“AZƏRBAYCAN MƏNİM ÜRƏYİMDİR”
Azərnəşr tarix elmləri doktoru professor Ağalar Abbasbəylinin “Azərbaycan mənim ürəyimdir” kitabını çapdan buraxmışdır. Dörd fəsil, nəticə və əlavələrdən ibarət olan kitab bu sözlərlə başlayır: “Tale XX yüzillikdə Azərbaycan xalqına iki dəfə dövlət müstəqilliyini elan etməyə, istiqlaliyyət bayrağını yüksəltməyə imkan yaratmışdır. Birincinin ömrü qısa olsa da, 1991-ci il oktyabrın 18-də ucaldılmış istiqlaliyyət bayrağı bu gün onlarca beynəlxalq təşkilatın iqamətgahı önündə, Avropa, Amerika, Asiya və Afrika qitələrinin bir sıra ölkələrinin paytaxtlarında dalğalanmaqdadır. Çünki bu bayrağın gəstəyi etibarlı əllərdədir. Onun keşiyində Azərbaycan xalqının böyük oğlu, dünyanın sayılan-seçilən siyasətçilərindən olan Heydər Əlirza oğlu Əliyev dayanmışdır”.
“Heydər Əliyev və müasir dövr” adlanan birinci fəsildə müəllif Heydər Əliyevin 1969-cu ildə respublikaya rəhbərliyə başladığı vaxtdan sonrakı dövrə qısa nəzər salır, 1993-cü ilin yayında yenidən siyasi hakimiyyətə qayıdışını və az sonra Prezident seçilməsini siyasi, hərbi və iqtisadi böhran içində olan ölkənin xilasının yeganə şərti kimi səciyyələndirir. Haqlı olaraq vurğulanır ki, Heydər Əliyevin Prezident seçilməsini dünyanın aparıcı siyasətçiləri yüksək qiymətləndirirdilər. Məsələn, İngiltərənin o vaxtkı baş naziri Con Meycor Azərbaycan Prezidentinə göndərdiyi təbrik teleqramında yazırdı ki, Heydər Əliyev kimi nüfuzlu siyasətçinin prezident seçilməsi bütün regionda böyük əhəmiyyət kəsb edəcəkdir.
“Siyasi həyatın mərhələləri”, “Azərbaycanın müstəqilliyi, suverenliyi və dövlətçiliyi uğrunda mübarizə”, “Heydər Əliyev və Azərbaycan beynəlxalq aləmdə” adlı sonrakı fəsillərdə ötən əsrin 70-ci illərindən başlayaraq respublikamızın siyasi, iqtisadi və mədəni həyatındakı ən önəmli hadisələrdən, Azərbaycanın keçmiş Sovet İttifaqının qabaqcıl respublikaları sırasına çıxarılması sahəsində görülmüş işlərdən, nəhayət, son doqquz illik dövrdə Prezidentin çoxşaxəli fəaliyyətinin əsas məqamlarından söhbət açılır. Bu fəsillərdə oxucu Azərbaycanda ictimai-siyasi sabitliyin bərqərar edilməsi, ölkənin gələcək iqtisadi yüksəlişi üçün həlledici əhəmiyyəti olan yeni neft strategiyasının həyata keçirilməsi, demokratik dəyərlərə söykənən hüquqi dövlət quruculunun təməlini qoyan Konstitusiyanın işlənib hazırlanması və qəbul edilməsi, demokratik parlament seçkilərinin keçirilməsi və bir çox başqa məsələlər barədə məlumat ala biləcəkdir.
Müəllif Prezident Heydər Əliyevin müstəqil Azərbaycanın beynəlxalq aləmdə tanınması və nüfuzunun möhkəmləndirilməsi, ölkəmizin ən ağır problemi olan Ermənistan-Azərbaycan, Dağlıq Qarabağ münaqişəsinin sülh yolu ilə və ədalətlə həll edilməsi, xaricdə yaşayan soydaşlarımızın ümumi Vətənimizlə əlaqələrinin genişləndirilməsi və Azərbaycan diasporunun formalaşdırılması sahəsində gərgin və məqsədyönlü fəaliyyətinə, qətiyyətli mübarizəsinə geniş yer ayırmışdır.
Əlavələr bölməsində ölkəmizin rəhbərinin dövlət müstəqilliyimizin 10-cu ildönümünə həsr olunmuş təntənəli mərasimdə, Yeni Azərbaycan Partiyasının II qurultayında, Davos iqtisadi forumunda, dünya azərbaycanlılarının I qurultayında, Nyu-Yorkda BMT-nin iqamətgahında minillyin sammitində söylədiyi nitqlər, 2000-ci ilin yanvarında Azərbaycan və Rusiya prezidentlərinin imzaladıqları Bakı bəyannaməsi, 31 mart - azərbaycanlıların soyqırımı günü münasibətilə Prezident Heydər Əliyevin Azərbaycan xalqına müraciəti dərc olunmuşdur.
Kitabda çoxlu rəngli fotoşəkillər verilmişdir.
Nəşrin elmi məsləhətçisi Milli Elmlər Akademiyasının müxbir üzvü Abel Məhərrəmov, elmi redaktoru MEA-nın həqiqi üzvü Əli Abbasov, rəyçi Milli Məclisin deputatı, MEA-nın müxbir üzvü Nizami Cəfərovdur.
Bölmənin digər xəbərləri
