AZƏRBAYCAN NATO İLƏ UĞURLU ƏMƏKDAŞLIQ EDİR

04.07.2006 [20:30]
Çap et
A⁺ A^-

AZƏRTAC xəbər verir ki, iyulun 4-də Bakıdakı Avratlantika Mərkəzində ölkəmizdə səfərdə olan NATO baş katibinin müavini Jan Furne mətbuat konfransı keçirmişdir.

Azərbaycanda keçirilən növbəti NATO həftəsində iştirak etmək üçün Bakıya gəldiyini diqqətə çatdıran J.Furne, ölkəmizin Şimali Atlantika Alyansının tərəfdaşı kimi vacib rolunu vurğulamışdır.

Baş katibin müavini NATO həftəsi çərçivəsində bir sıra vacib tədbirlərin həyata keçirildiyini bildirmişdir. Bunlar NATO Beynəlxalq Məktəbinin yay sessiyası, Şimali Atlantika Alyansının dəstəyi ilə yaradılmış Avratlantika Mərkəzinin açılışı, “Azərbaycanda Melanj raket yanacağı oksidləşdiricisinin konvensiyası üzrə sülh naminə elmi proqram” layihəsinin açılışıdır.

İyulun 6-7-də isə Bakıda NATO/Avratlantika Tərəfdaşlıq Şurası (AATŞ) çərçivəsində “Terrorçuluğa qarşı tərəfdaşlığın tədbirlər Planı”nın operativləşdirilməsi: Tərəfdaşların NATO-nun terrorçuluqla mübarizə əməliyyatlarında iştirakı və töhfəsi” mövzusunda işçi seminarı keçiriləcəkdir.

Azərbaycanın NATO ilə uğurlu əməkdaşlq etdiyini diqqətə çatdıran J.Furne, gələcəkdə münasibətlərin daha genişlənəcəyinə ümidvar olduğunu söyləmişdir.