AZƏRBAYCAN ÖZÜNÜ ELEKTRİK ENERJİSİ İLƏ TAM TƏCHİZ ETMƏK İMKANINA MALİKDİR
AZƏRTAC xəbər verir ki, “Azərenerji” Açıq Səhmdar Cəmiyyətinin (ASC) vitse-prezidenti Marlen Əsgərov iyulun 22-də keçirdiyi mətbuat konfransında qurumun fəaliyyətindən, perspektiv planlardan, mövcud problemlərdən danışmışdır.
Azərbaycanın energetika sənayesinin inkişafı üçün ölkəmizin başçısının gördüyü işlərin əhəmiyyətini diqqətə çatdıran M.Əsgərov demişdir ki, Prezident İlham Əliyevin ciddi nəzarəti altında energetika sistemində islahatlar həyata keçirilir, geniş quruculuq işləri görülür.
Ölkəmizdə elektrik enerjisi istehsalının ilbəil artdığını vurğulayan vitse-prezident bildirmişdir ki, Azərbaycan bu gün özünü elektrik enerjisi ilə tam təmin etməklə yanaşı, müəyyən həcmdə ixraca da yönəldir. Azərbaycan Prezidenti İlham Əliyevin Sərəncamı ilə qısa müddətdə tikilib istifadəyə verilmiş ümumi gücü 452 meqavat olan modul tipli 5 stansiya Naxçıvanda, Astarada, Şəkidə, Xaçmazda, Bakıda istehlakçıların elektrik enerjisinə tələbatını ödəmək üçün yeni imkanlar açmış, ölkəmizin Rusiyadan enerji asılılığını aradan qaldırmışdır.
Diqqətə çatdırılmışdır ki, tezliklə Sumqayıtda 517 meqavatlıq buxar-qaz qurğusu istismara veriləcəkdir. Eyni zamanda, Səngəçalda gücü 300 meqavat olan modul stansiyanın, həmçinin Şirvanda 750 meqavatlıq “Cənub” Elektrik Stansiyasının, Ləzə dağ-xizək idman kompleksinin elektrik enerjisi təchizatının təmin edilməsi məqsədi ilə 12 aqreqatdan ibarət ümumi gücü 104 meqavat olan “Quba” Elektrik Stansiyasının, 50 meqavatlıq “Füzuli” Su Elektrik Stansiyasının və digər enerji obyektlərinin inşası davam etdirilir. Bundan əlavə, bir sıra güc mərkəzlərində yenidənqurma işlərinin aparılması nəzərdə tutulur.
Bildirilmişdir ki, iqtisadiyyatın sürətlə inkişafı növbəti illər üçün generasiya güclərinin artırılmasını tələb edir. Bu məqsədlə “Azərenerji” iri və kiçik su elektrik stansiyalarının tikintisi layihələrinin araşdırılmasını həyata keçirərək müvafiq proqram hazırlamışdır. Bu proqramda Tovuzda 380 meqavatlıq, Girdimançay üzərində ümumi gücü 150 meqavat olan iki ədəd, eyni zamanda 500-ə yaxın kiçik su elektrik stansiyasının tikintisi planlaşdırılır. Bütün bunlar Azərbaycanı həm də elektrik enerjisi ixrac edən ölkəyə çevirəcəkdir.
Yeni elektrik stansiyalarının işə salınması nəticəsində əsasən baza generasiya gücləri sahəsində problemlərin aradan qaldırıldığını vurğulayan M.Əsgərov demişdir ki, ümumiyyətlə, yaxın 2-3 il ərzində 3000 meqavata yaxın yeni güclər işə salınacaqdır ki, bu da 50 milyard kilovat-saatdan artıq elektrik enerjisi istehsal etməyə imkan verəcəkdir.
Elektrik enerjisi istehsal edən yeni müəssisələrin yaradılması Azərbaycan iqtisadiyyatının inkişafı üçün son dərəcə əhəmiyyətlidir. Bütün bu işlər Azərbaycanı gələcəkdə etibarlı enerji təminatçısı edir.
“Azərenerji”nin rəsmisi Naxçıvanın enerji təchizatında əvvəlki illərdə mövcud olan problemlərin aradan qaldırıldığını, artıq muxtar respublikanın enerji sisteminin İran və Türkiyənin enerji sistemləri ilə paralel işlədiyini demişdir.
Hazırda Azərbaycan-Gürcüstan-Türkiyə enerji sistemlərinin birləşdirilməsi layihəsi ilə bağlı tərəflər arasında müzakirələrin aparıldığını deyən M.Əsgərov bildirmişdir ki, Azərbaycan tərəfi bu layihə çərçivəsində 80 kilometr yeni elektrik xətti çəkməlidir. Əsas və böyük maliyyə tutumlu işlər Gürcüstan ərazisində görülməlidir.
Sonda “Azərenerji” ASC 22 iyul - Milli Mətbuat günü münasibətilə bir qrup jurnalisti mükafatlandırmışdır.
Bölmənin digər xəbərləri
