RƏSMİ XRONİKA
AZƏRBAYCAN PREZİDENTİ HEYDƏR ƏLİYEV ALMANİYANIN XARİCİ İŞLƏR NAZİRİ İLƏ GÖRÜŞMÜŞDÜR
Nazir onun Azərbaycan Prezidenti ilə görüşməsinə imkan yarandığından şərəf duyduğunu bildirdi.
Dövlətimizin başçısı da bu görüşə xüsusi əhəmiyyət verdiyini vurğulayaraq dedi: Ölkələrimiz arasında yaxşı əlaqələr yaranmışdır və mən bunu yüksək qiymətləndirirəm. Mən sizin ölkənin rəhbərlərinin regionumuzda baş verən hadisələrə obyektiv qiymət vermələrindən və Azərbaycanın mövqeyini dəstəkləmələrindən çox məmnunam. Respublikamızın rəhbəri Ermənistan-Azərbaycan münaqişəsinin beynəlxalq təşkilatlarda müzakirəsi zamanı Almaniya dövlətinin prinsipial mövqe tutmasından xüsusi razılıqla söhbət açdı.
Ölkələrimiz arasında əməkdaşlığın daha da genişləndirilməsi ilə əlaqədar görülən tədbirlərdən bəhs edən Prezident Heydər Əliyev Almaniya bundestaqı üzvlərinin, bir sıra nazirliklərin yüksək vəzifəli şəxslərinin daxil olduğu nümayəndə heyətlərinin Azərbaycana səfərlərindən, onlarla aparılan danışıqların nəticələrindən razı qaldığını bildirdi.
Prezident Heydər Əliyev nazirə müraciətlə dedi ki, biz sizin, Almaniya dövləti rəhbərlərinin, xüsusən cənab Helmut Kolun Azərbaycana rəsmi səfərə gəlməsindən çox məmnun olardıq.
Cənab Kinkel bu ilin dekabrında Azərbaycana rəsmi səfərə gəlmək niyyətində olduğunu açıqladı. Respublikamızın rəhbəri bu məlumatı razılıqla qarşıladı və əmin olduğunu bildirdi ki, həmin səfər zamanı hər iki ölkəni maraqlandıran bir çox mühüm məsələlər barədə ətraflı danışıqlar aparmaq imkanı olacaqdır.
Nazir Almaniyanın Azərbaycana marağından söhbət açaraq ölkələrimizin iqtisadi əlaqələrini daha da möhkəmləndirmək üçün yaxın gələcəkdə imzalanması nəzərdə tutulan bir sıra sazişlər üzərində aparılan işdən bəhs etdi. Daha sonra o, Azərbaycan parlamentinə ilk demokratik seçkilərin respublikanın gələcək həyatında mühüm rol oynayacağına əmin olduğunu bildirdi.
Prezident Heydər Əliyev seçkilərə hazırlıqla əlaqədar respublikamızda görülən tədbirlərdən geniş bəhs edərək dedi ki, yeni parlamentin tam demokratik şəraitdə seçilməsi üçün Azərbaycanda hər cür şərait yaradılmışdır. Respublikamızın rəhbəri bildirdi ki, bu seçkilərin gedişini izləmək üçün Azərbaycana bütün beynəlxalq təşkilatlardan, bir çox dövlətlərdən, o cümlədən Almaniyadan müşahidəçilər gəlmişdilər və yenə də gələcəklər.
Görüşdə digər məsələlər barədə də fikir mübadilsə aparıldı.