AZƏRBAYCAN PREZİDENTİ HEYDƏR ƏLİYEV İRAN SƏFİRİNİ QƏBUL ETMİŞDİR
Azərbaycan Respublikasının Prezidenti Heydər Əliyev aprelin 21-də Prezident sarayında İranın Bakıdakı səfiri Əhəd Qəzaini qəbul etmişdir.
Respublikamızın rəhbəri Heydər Əliyev səfirlə hal-əhval tutaraq dedi ki, İrana nəzərdə tutduğu səfəri may ayında, münasib vaxtda həyata keçirəcəkdir. Beləliklə həm Azərbaycan, həm də İran əməkdaşlıq sahəsində irəliyə gedəcəkdir.
Dövlətimizin başçısı bildirdi ki, indi isə məqsədimiz Xəzəryanı dövlətlərin başçılarının Aşqabad görüşündə iştirak etməkdir. İran Prezidentinin də iştirak edəcəyi bu görüşün Xəzər dənizində əməkdaşlıq sahəsində yeni mərhələ açacağına ümid etdiyini söyləyən Prezident Heydər Əliyev dedi ki, Xəzəryanı ölkələr sıx əməkdaşlıq etməli və Xəzər dostluq, mehriban qonşuluq və səmərəli əməkdaşlıq dənizi olmalıdır. Xəzərdə heç bir dövlət digərinə hədə-qorxu gəlməməli, zor işlətməməlidir. Bütün məsələlər beynəlxalq hüquq normaları və Xəzər dənizində yaranmış təcrübə əsasında həll olunmalıdır.
Səfir Prezident Xatəminin ikitərəfli görüşlər keçirmək üçün Aşqabada bir qədər tez gedəcəyini vurğuladı.
Prezident Heydər Əliyev bildirdi ki, Aşqabadda Azərbaycan və İran Prezidentlərinin də təkbətək görüşləri olacaqdır.
Dövlətimizin başçısı daha sonra səfirə müraciətlə dedi ki, siz bizim bəzi qəzetlərdə dərc edilmiş materiallar haqqında narazılığınızı bildirmisiniz. Mən bunu başa düşürəm. Ancaq sizinlə söhbətdə dedim və indi də bildirmək istəyirəm ki, qəzetlərdə yazılanlar Azərbaycanın dövlət siyasətinə aid deyildir. Bu, ayrı-ayrı alimlərin, jurnalistlərin, şəxslərin fikirləridir. Onlar da bunu vaxtaşırı deyirlər. Bəzi qəzetlərdəki bu yazılara mən öz münasibətimi bildirdim. Bildirdim ki, həmin xəritəni dərc etməklə və xüsusən o xəritədə Təbriz şəhərinin üzərində müstəqil Azərbaycanın bayrağını verməklə onlar səhv edirlər. Bu ağılsızlıqdan əmələ gələn şeydir. İran bütöv dövlətdir. Azərbaycan da əsas prinsip kimi, hər bir dövlətin ərazi bütövlüyünü müdafiə edir. Çünki Azərbaycanın özünün ərazi bütövlüyü pozulubdur.
Prezident Heydər Əliyev xatırlatdı ki, Azərbaycan neçə vaxtdır separatçı qüvvələrlə mübarizə aparır. Dağlıq Qarabağın üzərində hansısa başqa bir dövlətin bayrağının olmasını Azərbaycan heç vaxt qəbul edə bilməz. Doğrudur, onlar indi özlərinə uydurma bir “cümhuriyyət” yaradıblar, “bayraq” yaradıblar. Amma heç kəs, heç bir ölkə bunları tanımır. Ermənistan da Dağlıq Qarabağın müstəqilliyini rəsmi tanımayıbdır. Sadəcə, müharibə gedibdir, döyüşlər olubdur. Ermənistanın silahlı qüvvələri bəzi səbəblərdən Azərbaycan ərazisinin bir qismini işğal ediblər. Birinci növbədə Dağlıq Qarabağı işğal ediblər. Biz bununla razılaşmırıq və razılaşmayacağıq da. Azərbaycanın ərazi bütövlüyünü mütləq təmin edəcəyik. Azərbaycanın bütün ərazisində dövlətimizin suverenliyi bərpa olunacaqdır.
Azərbaycan Prezidenti dedi ki, öz problemlərimizi həll etmək əvəzinə, indi bəzi adamlar dünyanın bir çox məsələlərini həll etmək istəyirlər.
Harada nə olub, hansı dövlət olub, nə cür olubdur - bunlar keçmişdə qalıbdır. Amma reallıq bundan ibarətdir ki, Azərbaycan vaxtilə Rusiyanın, sonra isə Sovetlər İttifaqının tərkibində olubdur. Nəhayət, on il bundan əvvəl ölkəmiz müstəqillik əldə edibdir. İndi müstəqil Azərbaycan var. İranda da Şərqi Azərbaycan var, Qərbi Azərbaycan var. Onlar İranın ostanları, yəni əyalətləridir. Buna heç kəsin şübhəsi yoxdur və ola da bilməz. Qəzetlərdəki həmin yazıların müəllifləri İran-Azərbaycan əlaqələrinə zərər gətirirlər. Biz çalışmalıyıq ki, əlaqələrimizi qoruyaq və əməkdaşlığımızı möhkəmləndirək. İran İslam Respublikası Azərbaycanın ərazi bütövlüyünü tanımışdır və indi də tanıyır. Azərbaycan da İranın ərazi bütövlüyünü tanıyır. İranın heç bir bölgəsinə heç kəsin iddiası ola bilməz.
Səfir Əhəd Qəzai dedi ki, iki ölkə arasında münasibətlərə xələl gətirən belə hallara kimlərsə bilərəkdən, bəziləri isə dərk etmədən yol verirlər. İranla Azərbaycan arasında dostluq, qardaşlıq münasibətlərini istəməyənlər isə bundan istifadə edirlər. Diplomat belə hallara münasibətini açıqladığına görə dövlətimizin başçısına bir daha təşəkkür edərək dedi ki, bunu öz ölkəsinin rəhbərliyinə çatdıracaqdır.
İranin xarici işlər nazirinin ölkəmizə qısamüddətli səfəri zamanı Azərbaycan Prezidenti Heydər Əliyevlə, digər rəsmi şəxslərlə görüşlərindən onun razı qaldığını vurğulayan Əhəd Qəzai əmin etdi ki, səfir kimi o, İranla Azərbaycan arasında münasibətlərin daha da yaxşılaşdırılması üçün əlindən gələni edəcəkdir.
Qəbulda Prezidentin Katibliyinin rəisi Dilarə Seyidzadə və Prezidentin İcra Aparatının xarici əlaqələr şöbəsinin müdiri Novruz Məmmədov iştirak edirdilər.
Foto Oqtay Aydınoğlunundur
Bölmənin digər xəbərləri
