AZƏRBAYCAN PREZİDENTİ HEYDƏR ƏLİYEV TEHRANA GƏLMİŞDİR
Azərbaycan Respublikasının Prezidenti Heydər Əliyev mayın 18-də günorta Tehrana gəlmişdir.
İran paytaxtının Mehrabad hava limanında dövlətimizin başçısının şərəfinə fəxri qarovul dəstəsi düzülmüşdü.
Azərbaycan Respublikasının Prezidenti Heydər Əliyevi təyyarənin pilləkəni yanında İranın kooperasiya naziri Əli Sufi, xarici işlər nazirinin müavini Möhsün Əminzadə, İran Prezidentinin Xəzər məsələləri üzrə xüsusi nümayəndəsi Mehdi Səfəri, Azərbaycanın Tehrandakı səfiri Abbasəli Həsənov, İranın Bakıdakı səfiri Əhəd Qəzai mehribanlıqla qarşıladılar. Respublikamızın rəhbərinə gül dəstəsi təqdim olundu.
Azərbaycan Prezidenti Heydər Əliyev fəxri qarovul dəstəsinin qarşısından keçdi.
Dövlətimizin başçısı maşın karvanının müşayiəti ilə onun üçün ayrılmış iqamətgaha gəldi.
Azərbaycan Prezidenti Heydər Əliyev qısa istirahətdən sonra İran Prezidentinin dövlət iqamətgahına gəldi. Burada rəsmi qarşılanma mərasimi oldu.
Respublikamızın rəhbərinin şərəfinə fəxri qarovul dəstəsi düzülmüşdü. İran İslam Respublikasının Prezidenti cənab Seyid Məhəmməd Xatəmi Azərbaycan Respublikasının Prezidenti Heydər Əliyevi hərarətlə qarşıladı.
Azərbaycanın və İranın dövlət himnləri səsləndi. Prezidentlər fəxri qarovul dəstəsinin qarşısından keçdilər.
Rəsmi qarşılanma mərasimindən sonra Azərbaycan Prezidenti Heydər Əliyev və İran Prezidenti Seyid Məhəmməd Xatəmi arasında görüş oldu. Görüşün əvvəlində dövlət başçıları jurnalistlərin ikitərəfli münasibətlər, Ermənistan-Azərbaycan münaqişəsi, Fələstin problemi, Xəzərin statusu ilə bağlı suallarına cavab verdilər. Sonra görüş mətbuat nümayəndələrinin iştirakı olmadan davam etdirildi. İki saatdan çox çəkən görüşdə Qafqazda və Xəzər regionunda vəziyyət, qarşılıqlı əməkdaşlıq barədə, habelə tərəfləri maraqlandıran digər məsələlər ətrafında geniş fikir mübadiləsi aparıldı.
Daha sonra Prezident Heydər Əliyevin və Prezident Seyid Məhəmməd Xatəminin iştirakı ilə geniş tərkibdə Azərbaycan-İran danışıqları oldu.
Mayın 18-də axşam İran İslam Respublikasının Prezidenti Seyid Məhəmməd Xatəminin adından Azərbaycan Respublikasının Prezidenti Heydər Əliyevin şərəfinə rəsmi qəbul təşkil edildi.
Azərbaycan Prezidenti Heydər Əliyevin İrana rəsmi səfəri davam edir.
Aslan Aslanov
AZƏRTAC-ın xüsusi müxbiri
Tehran
Bölmənin digər xəbərləri
