AZƏRBAYCAN PREZİDENTİ HEYDƏR ƏLİYEVİN ABŞ-IN ENERGETİKA NAZİRİ İLƏ GÖRÜŞÜ
Xəbər verdiyimiz kimi, Azərbaycan Respublikasının Prezidenti Heydər Əliyev fevralın 25-də, onun üçün ayrılmış iqamətgahda - “Fermont” mehmanxanasında ABŞ-ın energetika naziri Spenser Abrahamı qəbul etmişdir.
Dövlətimizin başçısı ilə yenidən görüşməsindən böyük məmnunluq duyduğunu bildirən ABŞ-ın energetika naziri dedi ki, biz hamımız Sizi Vaşinqtonda salamlayırıq və bu qəbula görə Sizə minnətdarlığımızı bildiririk. Biz Sizinlə görüşərkən özümüzü çox xoşbəxt hiss edirik və səfərinizdə Sizə uğurlar arzulayırıq. Prezident Buş və vitse-prezident Çeyni Sizinlə görüşü səbirsizliklə gözləyirlər və bizim hamımız Sizin Vaşinqtona gəlməyinizdən çox şadıq.
Prezitdent Heydər Əliyev bu görüşə görə və dediyi xoş sözlərə görə nazirə təşəkkür etdi və xatırlatdı ki, ötən ilin sentyabrın 18-i bizim üçün tarixi bir hadisə oldu. Biz neçə illər işlədiyimiz, hazırladığımız layihənin icra olunmasına başladıq. Məhz Amerika Birləşmiş Ştatları tərəfindən sizin, energetika nazirinin orada iştirakı bizim üçün çox böyük əhəmiyyət kəsb edir.
Dövlətimizin başçısı Vaşinqtonda “Şərq-Qərb enerji dəhlizi reallıqdır” mövzusunda Amerika Birləşmiş Ştatlarının, Azərbaycanın, Gürcüstanın və Türkiyənin birlikdə keçirdiyi beynəlxalq konfransı yüksək qiymətləndirdi və dedi ki, belə konfrans heç olmamışdı. Mən bunu təklif etdim və çox məmnunam ki, Amerika tərəfi də, bizim tərəfdaşlarımız - Gürcüstan da, Türkiyə də bunu yaxşı qəbul etdi, birlikdə toplaşdıq və Bakı-Tbilisi-Ceyhan və Bakı-Ərzurum kəmərlərinin əhəmiyyəti haqqında hamımız bir daha danışdıq. Demək olar ki, cəmiyyət üçün bir daha onun təqdimatını etdik. Layihə başlanandan Amerika Birləşmiş Ştatları bizə dəstək veribdir. Əgər bu dəstək olmasaydı, təbii ki, biz irəliyə gedə bilməzdik.
Prezident Heydər Əliyev cənab Abrahamın indiyədək görüşdüyü ABŞ-ın dördüncü energetika naziri olduğunu xatırladaraq, bu görüşlərin əhəmiyyətini, nazirlərin hər birinin böyük təcrübəyə malik olduğunu söylədi. Dövlətimizin başçısı dedi ki, güman edirəm, Amerika Birləşmiş Ştatlarının enerji naziri kimi, Sizin Bakı-Tbilisi Ceyhan layihəsinin məhz indi həyata keçirilməsinə böyük köməyiniz olacaqdır.
ABŞ-ın energetika naziri Spenser Abraham Bakıdakı görüşləri yada saldı və dedi ki, bizim həyata keçirdiyimiz bu layihə Prezident Buşun enerji strategiyasının vacib bir hissəsidir və bu, dünyada neftin nəqli istiqamətlərinin çoxşaxəli olmasını təmin etmək üçündür. Cənab Prezident Buş və ABŞ hökuməti neft və qazla bağlı olan bütün layihələrin hamısını dəstəkləyir. Bu layihələr təkcə Azərbaycan üçün deyil, region üçün də çox vacibdir və şübhəsiz ki, qlobal səviyyədə neft və qaz təchizatını artıracaqdır. Bunlar Azərbaycan üçün də, Birləşmiş Ştatlar üçün də çox əhəmiyyətli layihələrdir. Biz onları bu günə qədər möhkəm dəstəkləmişik və irəliyə getdikcə də bunu davam etdirəcəyik.
Cənab Spenser Abraham “Şərq-Qərb enerji dəhlizi reallıqdır” mövzusundakı konfransın yaxşı keçməsinin elə bu layihələrin uğurla reallaşdırılmasının əlaməti olduğunu vurğulayaraq dedi:
-Prezident Buş mənə tapşırmışdır ki, mən bu işlərlə məşğul olum. Çox təəssüf edirəm ki, konfransın işində iştirak edə bilməmişəm. Lakin biz bu işlə çox yaxından məşğuluq. Bizə tapşırılıb ki, vaxtaşırı Konqresə gedib konqresmenləri bu layihənin lazımlı olmasına inandırmağa səy göstərək. Bu gün mənim növbəmdir. Bakıda da demişdim, indi də təkrar etmək istəyirəm ki, həmin layihənin uğurla həyata keçirilməsi Sizin xidmətləriniz, Sizin liderlik qabiliyyətiniz sayəsindədir. Bundan sonra da layihəyə dəstək verməkdə davam edəcəyik. Bu, ölkələrimiz arasında münasibətlərin inkişafına, xüsusən də enerji məsələləri ilə bağlı əməkdaşlığa yeni təkan verəcəkdir.
İxrac boru kəmərləri layihələrinin reallaşdırılmasına ABŞ-ın dəstəyini bir daha xüsusi vurğulayan Prezident Heydər Əliyev əmin olduğunu bildirdi ki, ölkələrimizin çoxşaxəli əməkdaşlığı gələcəkdə də uğurla davam etdiriləcək və Birləşmiş Ştatlar Qafqaz bölgəsində təhlükəsizlik və sabitliyin təmin olunmasına, tərəqqiyə köməyini artıracaqdır.
Bölmənin digər xəbərləri
