AZƏRBAYCAN PREZİDENTİ HEYDƏR ƏLİYEVİN FRANSAYA RƏSMİ SƏFƏRİ DAVAM EDİR
Parisin Orli hava limanında Azərbaycan Prezidentinin şərəfinə təntənəli qarşılanma mərasimi keçirildi. Hava limanında Azərbaycanın və Fransanın dövlət bayraqları dalğalanırdı. Təyyarə meydanında fəxri qarovul dəstəsi düzülmüşdü.
Azərbaycan Prezidenti Heydər Əliyevin təyyarənin pilləkəni yanında Fransanın yüksək vəzifəli şəxsləri qarşıladılar.
Fəxri qarovul dəstəsinin rəisi dövlətimizin başçısına raport verdi.
Hərbi orkestr Azərbaycanın və Fransanın dövlət himnlərini ifa etdi. Respublikamızın rəhbəri Fransanın bayrağına ehtiram göstərdi,
fəxri qarovul dəsrəsinin qarşısından keçdi.
Sonra Prezident Heydər Əliyev fəxri motoskletçilər dəstəsinin müşayiəti ilə onun üçün ayrılmış iqamətgaha gəldi.
Dövlətimizin başçısı digər ölkələrə səfərlərdə olduğu kimi, bu dəfə də istirahətə vaxt ayırmadı, dərhal Yenlisey sarayına yola düşdü.
Fransa paytaxtının qədim və yaraşıqlı tikililərindən biri olan Yelisey sarayının həyətindəki meydanda respublikamızın rəhbərinin şərəfinə fəxri qarovul dəstəsi düzülmüşdü. Prezident Heydər Əliyevi gətirən avtomibil meydana daxil olan kimi orkestrin ifa etdiyi marşın əzəmətli sədaları ətrafa yayıldı.
Dövlətimizİn başçısı fəxri qarovul dəstəsinin qarşısından keçdi. Fransa Respublikasının Prezidenti Jak Şirak Azərbaycan Respublikasının Prezidenti Heydər Əliyevi Yelisey sarayının həyətində mehribanlıqla qarşıladı. Qarşılanma mərasimindən dərhal sonra dövlət başçılarının görüşü oldu.
Prezident Heydər Əliyev və Prezident Jak Şirak Xəzərin Azərbaycan sektorundakı “Lənkəran-dəniz”, “Talış-dəniz” yataqlarının birgə işlənməsi haqqında ARDNŞ ilə Fransanın “Elf Akiten” və “Total” neft şirkətləri arasında müqavilənin imzalanması mərasimində iştirak etdilər. Sənədi ARDNŞ-in prezidenti Natiq Əliyev, “Elf Akiten”in prezidenti Filipp Jafre və “Total”ın prezidenti Tyerri Demore imzaladılar.
Fransa və Azərbaycan prezidentləri imzalanma mərasimində qısa bəyanatlar verdilər.
Sonra Fransa Prezidenti Jak Şirak Azərbaycan Prezidenti Heydər Əliyevin şərəfinə ziyafət verdi.
Elə həmin güm dövlətimizin başçısı öz iqamətgahında Parisin meri Jan Tieri, Fransanın maliyyə və xarici ticarət üzrə dövlət naziri İv Qalan ilə görüşlər keçirdi.
Yanvarın 13-də Prezident Heydər Əliyev Fransa Milli Məclisinə gəldi.
Binanın həyətində dövlətimizin baçısının şərəfinə fəxri qarovul dəstəsi düzülmüşdü. Burda da qarşılanma mərasimi oldu.
Milli Məclisin sədri Filip Segen Prezident Heydər Əliyevi səmimi salamladı. Sonra Prezident Heydər Əliyevin və Fransa Milli Məclisinin sədri Filip Segenin başçılıq etdikləri nümayəndə heyətləri arasında görüş keçirildi.
Görüşdən sonra Prezident Heydər Əliyev Fransa Milli Məclisinin fəxri qonaqlar kitabına ürək sözlərini yazdı. Filip Segen Prezident Heydər Əliyevə Fransa Milli Məclisinin xatirə medalını təqdim etdi.
Azərbaycan Prezidenti Heydər Əliyev yanvarın 13-də axşam Parisdəki Beynəlxalq Əlaqələr İnstitutunun əməkdaşları, Fransanın ictimai-siyasi xadimləri ilə görüşdü. Görüşə toplaşanlar respublikamızın rəhbərini hərarətlə salamladılar.
İnstitutun rektoru De Monreal görüşü giriş sözü ilə açaraq, dünyanın ən görkəmli dövlət xadimlərindən biri olan Heydər Əliyevin həyat və fəaliyyətindən danışdı. Prezident Heydər Əliyevin “Azərbaycan və Qafqaz XXI əsrin astanasında” mövzusunda mühazirəsi böyük diqqətlə dinlənildi və alqışlarla qarşılandı.
Azərbaycan Prezidenti görüş iştirakçılarını maraqlandıran suallara da cavab verdi.
Həmin gün axşam “Elf Akiten” şirkəti Prezident Heydər Əliyevin şərəfinə ziyafət verdi.
Azərbaycan Prezidenti Heydər Əliyev yanvarın 14-də səhər Fransa Ticarət-Sənaye Palatasında oldu. Palatanın sədri dövlətimizin başçısına bu qurumun işi barədə məlumat verdi. Prezident Heydər Əliyev palatanın fəxri qonaqlar kitabına öz ürək sözlərini yazdı. Azərbaycanın rəhbərinə Fransa Ticarət-Sənaye Palatasının xatirə medalı təqdim olundu. Prezident Heydər Əliyevin şərəfinə burada rəsmi qəbul təşkil edildi. Ölkəmizin başçısı qəbulda çıxış etdi. Fransanın iş adamlarını maraqlandıran suallara cavab verdi.
Sonra dövlətimizin rəhbəri Fransa senatına gəldi. Binanın qarşısında fəxri qarovul dəstəsi düzülmüşdü. Senatın sədri cənab Rene Monore Prezident Heydər Əliyevi səmimi qarşıladı. Sonra Fransa senatının sədri ilə Azərbaycan Prezidenti arasında danışıqlar oldu. Danışıqlar başa çatdıqdan sonra dövlətimizin başçısı senatın xatirə kitabına ürək sözlərini yazdı. Prezident Heydər Əliyevə Fransa senatının xatirə medalı təqdim edildi.
Elə həmin gün Prezident Heydər Əliyev öz iqamətgahında “Total” şirkətinin rəhbərləri ilə görüşdü.
Azərbaycan Prezidentinin Fransa aviasiya şirkətlərindən birinin rəhbərləri ilə görüşündə qarşılıqlı maraq doğuran məsələlər müzakirə olundu.
Prezident Heydər Əliyev Fransanın tanınmış kütləvi informasiya vasitələrinin nümayəndələrinə müsahibə verdi.
Dövlətimizin başçısı yanvarın 14-də Fransanın xarici işlər naziri Erve de Şaret ilə də görüşdü. Ölkələrimiz arasında ikitərəfli əməkdaşlığa dair sənədlər imzalandı. Sonra Azərbaycan rəhbərinin şərəfinə rəsmi ziyafət verildi.
Azərbaycan Prezidenti Heydər Əliyevin Fransaya rəsmi səfəri davam edir.
Bölmənin digər xəbərləri
