AZƏRBAYCAN PREZİDENTİ HEYDƏR ƏLİYEVİN GÜRCÜSTANIN PREZİDENTİ EDUARD ŞEVARDNADZE İLƏ GÖRÜŞÜ
Xəbər verdiyimiz kimi, MDB-nin üzvü olan ölkələrin dövlət başçılarının Ukrayna paytaxtında keçirilən zirvə görüşündə iştirak edən Azərbaycan Respublikasının Prezidenti Heydər Əliyevin yanvarın 28-də Gürcüstanın Prezidenti Eduard Şevardnadze ilə görüşü olmuşdur.
Prezidentlər Heydər Əliyev və Eduard Şevardnadze bir-birini səmimiyyətlə salamlayaraq, ənənəvi xarakter almış görüşlərindən məmnun olduqlarını bildirdilər.
Görüş zamanı ölkələrimiz arasında ikitərəfli əlaqələrin daha da genişləndirilməsi və inkişaf etdirilməsi məsələləri barədə fikir mübadiləsi aparıldı.
Prezidentlər Xəzərin zəngin karbohidrogen yataqlarının işlənilməsi və enerji ehtiyatlarının dünya bazarlarına nəqli, o cümlədən Bakı-Tbilisi-Ceyhan əsas ixrac neft kəmərinin inşası ilə bağlı məsələləri nəzərdən keçirdilər. Dövlət başçıları bu layihə ilə əlaqədar qarşıya çıxan çətinliklərin aradan qaldırılması üçün bundan sonra da birgə səylər göstərilməsinin zəruriliyini bildirdilər.
Azərbaycan və Gürcüstan prezidentləri Cənubi Qafqazda və ümumən Qafqazda təhlükəsizliyin və sabitliyin bərqərar olmasının regionun inkişafı və tərəqqisi üçün vacibliyini vurğuladılar, mövcud münaqişələrin - Ermənistan-Azərbaycan, Dağlıq Qarabağ, gürcü-abxaz, gürcü-osetin münaqişələrinin həlli yolları barədə fikir mübadiləsi apardılar.
Ənənəvi dostluq və mehribanlıq şəraitində keçən görüşdə tərəflər hər iki ölkəni maraqlandıran bir sıra digər məsələlər üzərində də dayandılar.
Bölmənin digər xəbərləri
