Azərbaycan Respublikasının Prezidenti Heydər Əliyevin Ankaranın Gülhanə Hərbi Tibb Akademiyasında müayinəsinin gedişi ilə bağlı ölkəmizin Türkiyədəki səfiri Məmməd Əliyev iyulun 17-də AZƏRTAC-ın xüsusi müxbirinə qısa müsahibə vermişdir. Səfir demişdir:

- Azərbaycan Prezidenti, hörmətli Heydər Əliyevin səhhəti çox yaxşıdır. Müayinə planlaşdırıldığı kimi uğurla davam edir. Mən hər gün cənab Prezidentlə görüşür, dövlətimizin başçısını maraqlandıran məsələlər haqqında məruzə edirəm.

Cənab Prezident özü də kütləvi informasiya vasitələrini izləyir. Bakı ilə mütəmadi olaraq əlaqə saxlayır, zəruri məlumatları alır. Dövlətimizin başçısının əhval-ruhiyyəsi çox yüksəkdir. Əvvəllər də, dediyim kimi, Prezident Heydər Əliyevi müayinə edən admiral, professor, tibb elmləri doktoru Ertan Dəmirtaş başda olmaqla təcrübəli həkimlərin fikri belədir ki, indiyə qədər aparılan bütün tibbi müayinələrin nəticələri müsbətdir.

SUAL: Cənab səfir, Azərbaycan Respublikasının Prezidenti Heydər Əliyev ilə çoxları görüşmək istəyir. Mətbuatda da bu barədə məlumatlara rast gəlirik. Sizin də söylədiyinizə görə, bəzi görüşlər planlaşdırılıbdır.

CAVAB: Bəli, cənab Prezident Heydər Əliyevin Türkiyədə çox sevildiyi, görkəmli dövlət xadimi və siyasi xadim kimi yüksək qiymətləndirildiyi hamıya məlumdur. Cənab Prezidentlə görüşmək istəyənlər çoxdur. Ancaq təbii ki, hamının arzusunu yerinə yetirmək mümkün deyildir.

Cənab Prezidentin Türkiyənin rəhbərliyi ilə telefon danışıqları olmuşdur. Gülhanə Hərbi Tibb Akademiyasının yüksək vəzifəli şəxsləri dövlətimizin başçısını Azərbaycana rəhbərlik etməyə başlamasının 34-cü ildönümü münasibətilə səmimi qəlbdən təbrik etmiş, ölkəmizin tərəqqisi naminə gördüyü böyük işlərdə möhtərəm Prezidentimizə müvəffəqiyyətlər arzulamışlar. Dövlətimizin başçısının ünvanına Türkiyədəki siyasi partiyaların sədrlərindən, deputatlardan, ictimai təşkilatların, beynəlxalq fondların rəhbərlərindən, ölkənin tanınmış elm, ədəbiyyat, mədəniyyət xadimlərindən çoxsaylı təbrik teleqramları daxil olmuşdur. İndi biz cənab Prezidentin Türkiyənin dövlət və hökumət rəhbərləri ilə görüşlərini hazırlayırıq.

SUAL: Azərbaycanın bəzi müxalifət qəzetləri “Turan” informasiya agentliyinə istinad edərək cənab Prezidentin guya Gülhanə Hərbi Tibb Akademiyasından çıxdığını, görüşlər keçirdiyini yazırlar. Bu barədə nə deyə bilərsiniz?

CAVAB: Bu cür xəbərlər xəstə fantaziyanın məhsuludur. Belə məlumatlar qətiyyən doğru deyildir. Bu, ötən günlər ərzində müxalifət mətbuatı tərəfindən yayılan qərəzli, məqsədyönlü kampaniyanın bir hissəsidir. Cənab Heydər Əliyev Gülhanənin prezidentlər üçün ayrılan xüsusi müayinə-istirahət iqamətgahında qalır. Görüşlərini də məhz bu iqamətgahda keçirir. Müxalifət qüvvələrinin yalana və ancaq şayiələrə əsaslanan məlumatlarından xalqımızın narahatlıq hissi keçirdiyini başa düşürəm. Ona görə də bildirirəm ki, narahatlığa heç bir əsas yoxdur, cənab Prezidentimizin səhhəti çox yaxşıdır, yaxın günlərdə müayinəsini başa çatdıraraq Vətənə qayıdacaqdır.