RƏSMİ XRONİKA
AZƏRBAYCAN PREZİDENTİ İLHAM ƏLİYEV LATIN MƏDƏNİYYƏTİ AKADEMİYASININ NÜMAYƏNDƏ HEYƏTİNİ QƏBUL ETMİŞDİR
Azərbaycan Respublikasının Prezidenti İlham Əliyev aprelin 19-da Prezident sarayında Bakıda keçirilən “Azərbaycan: sivilizasiyalararası dialoqun keçmişi və bu günü” mövzusunda XIII beynəlxalq konfransda iştirak edən Latın Mədəniyyəti Akademiyasının nümayəndə heyətini qəbul etmişdir.
Dövlətimizin başçısı qonaqları görməkdən çox şad olduğunu söylədi, beynəlxalq tədbiri məhz Bakıda keçirdiklərinə görə onlara minnətdarlığını bildirərək dedi ki, zənnimcə, konfransın burada təşkili bir-birimizi tanımaq üçün və ölkələrimizin daha da yaxınlaşmasından ötrü yeni imkanlar açacaq və sizin ideyalar regionda daha yaxşı şəkildə təşviq olunacaqdır. Azərbaycan çox mühüm bir məkanda yerləşir, müstəqil dövlət kimi gəncdir. Biz cəmi 15 ildir ki, müstəqil ölkə kimi yaşayırıq. Lakin bizim tariximiz olduqca böyükdür və genişdir, zəngin adət-ənənələrimiz var. Əsrlər boyu müxtəlif millətlərin, dinlərin nümayəndələri Azərbaycanda sülh və dostluq şəraitində yaşamışlar. Buna görə konfransın mövzusu, yəni, sivilizasiyalar arasında dialoq bizə yaxşı məlum olan mövzudur. Azərbaycan regionda nadir yerlərdən biridir ki, biz burada qarşılıqlı hörmət, ehtiram, anlaşma müşahidə edirik. Bütün dinlər arasında anlaşma var. Azərbaycanda tarix boyu dinlərarası heç bir münaqişə və yaxud toqquşma olmamışdır və mən əminəm ki, bu dostluq və qardaşlıq ruhu gələcəkdə daha da möhkəmlənəcəkdir. Mən hesab edirəm ki, ölkəmizin bu sahədəki təcrübəsi dünyanın müxtəlif guşələrində də öyrənilə bilər. Əgər millətlər sülh şəraitində yaşayırlarsa, ölkənin sürətli inkişafı da təmin edilir. Biz çoxmillətli ölkəyik, burada bir çox xalqların nümayəndələri yaşayır və onlar özlərini təhlükəsiz və rahat hiss edirlər.
Prezident İlham Əliyev daha sonra dedi ki, dünyanın hazırkı inkişaf mərhələsində biz sivilizasiyalar arasında dialoqdan danışırıq. Lakin bəzi hallarda reallıqda biz təhlükəli meyillər, toqquşmalar, təcridolunma və digər hallar görürük və bunları dini mənsubiyyətlə bağlayırlar. Bu, çox təhlükəli meyillərdir. Çünki bunun çox gözlənilməyən nəticələri olur. Mən hesab edirəm ki, dünyanın aparıcı intellektual dairələri - alimlər, qabaqcıl insanlar birgəyaşayış prinsiplərinin, dinlər arasında, xalqlar, millətlər arasında anlaşmanın təşviq olunmasında rol oynaya bilərlər. Beləliklə, təcridolunmanın qarşısını alarlar və bütün millətlərin nümayəndələri yan-yana yaşaya bilərlər. Hesab edirəm ki, bu konfransın keçirilməsi ideyası və orada müzakirə olunan məsələlər bütün bəşəriyyət üçün vacibdir. Əgər biz xalqlar arasında sülhün bərqərar edilməsinə nail ola bilsək, onda ölkələr, əsasən, özlərinin gündəlik problemlərinə daha çox diqqət ayıra biləcəkdir. Belə olsa, dünyada təhlükələrin sayı da azalacaqdır.
İndi Azərbaycan bu istiqamətdə inkişaf etməyə çalışır. Qonşularımızla çox yaxşı münasibətlərimiz var, çünki biz bu regionda yaşayırıq. Regional inkişaf və regional təhlükəsizlik bizim üçün vacibdir və bunun bizə praktik təsiri var. Bildiyiniz kimi, Azərbaycan dünya birliyinə fəal inteqrasiya olunur. Biz Avropa İttifaqının “Yeni qonşuluq siyasəti”nə qoşulmuşuq. Sülh olmadan siyasi, iqtisadi inkişaf baş verə bilməz. Eyni zamanda, ölkədə yaşayan xalqlar arasında problemlər olsa, biz buna nail ola bilmərik.
Bir sözlə, sizin keçirdiyiniz çox yaxşı konfransdır, yaxşı gündəliyi var. Konfransı keçirmək üçün çox müdrik olaraq, məhz bizim ölkəmizi seçmisiniz. Buna görə də sizə minnətdaram. Sizdən xahiş edirəm ki, vaxtınızı konfransa sərf etməklə yanaşı, boş vaxt tapıb Bakının tarixi yerlərini də gəzin, insanlarımızla görüşlər keçirin və Azərbaycanın bugünkü həyatı ilə daha yaxından tanış olun.
Sizi bir daha salamlayır və sizə uğurlar arzulayıram. Sağ olun.