AZƏRBAYCAN PREZİDENTİ İLHAM ƏLİYEV RUSİYANIN DAXİLİ İŞLƏR NAZİRİ RƏŞİD NURQALİYEVİ QƏBUL ETMİŞDİR
Azərbaycan Respublikasının Prezidenti İlham Əliyev dekabrın 22-də Prezident sarayında Rusiya Federasiyasının daxili işlər naziri Rəşid Nurqaliyevi qəbul etmişdir.
Ölkələrimizin daxili işlər nazirlikləri arasında yaxşı əlaqələrin olduğunu vurğulayan dövlətimizin başçısı bu əməkdaşlığın ikitərəfli münasibətlərin inkişafı baxımından vacibliyini qeyd etdi. Azərbaycan-Rusiya münasibətlərinin uğurla inkişaf etdiyini bildirən Prezident İlham Əliyev ölkəmizdə başa çatmış Rusiya İlinin qarşılıqlı anlaşma işinə xidmət göstərdiyini söylədi. Ölkələrimizin müxtəlif sahələrdə əməkdaşlığının uğurla davam etdiyini vurğulayan dövlətimizin başçısı hər iki ölkənin hüquq mühafizə orqanları arasında əlaqələrin də bu baxımdan mühüm rol oynadığını qeyd etdi.
Hazırda cinayətkarlığa qarşı mübarizənin universal xarakter daşıdığını bildirən Prezident İlham Əliyev dedi ki, hüquq mühafizə orqanlarının işinin əlaqələndirilməsi ölkələrimizin təhlükəsizliyi, habelə regional və beynəlxalq təhlükəsizlik üçün vacibdir. Bu gün terrorizmə və beynəlxalq cinayətkarlığa qarşı mübarizə qlobal xarakter daşıyır. Bu cür təhlükələrə qarşı ölkələrimizin birgə mübarizəsi vacibdir. İnformasiya mübadiləsi, qarşılıqlı yardım və digər sahələrdə əməkdaşlıq ölkələrimizin maraqlarına cavab verir. Bu baxımdan Rusiya daxili işlər nazirinin Azərbaycana səfəri böyük əhəmiyyət daşıyır.
Azərbaycan ilə Rusiya arasında əməkdaşlığın səmərəli olduğunu bildirən Rəşid Nurqaliyev dedi ki, bu gün biz transmilli mütəşəkkil cinayətkarlığa, beynəlxalq terrorizmə qarşı mübarizə, qeyri-leqal miqrasiya məsələlərini müzakirə etmişik. Transmilli mütəşəkkil cinayətkarlığın sərhədləri yoxdur. Bu, XXI əsrdə bütün dünya ölkələri üçün təhlükədir.
Ölkələrimiz arasında əməkdaşlıqdan razı qaldıqlarını söyləyən nazir məlumat verdi ki, Rusiya Daxili İşlər Nazirliyinin Daxili Qoşunları ilə Azərbaycan Daxili İşlər Nazirliyi Daxili Qoşunları Baş İdarəsi arasında 2007-2008-ci illər üçün birgə fəaliyyət haqqında protokol imzalanmış, birgə bəyanat verilmişdir. Nazir dedi ki, bizim birgə əməkdaşlığımız bütün sahələrdə uğurla inkişaf edir.
Bölmənin digər xəbərləri
