RƏSMİ XRONİKA
AZƏRBAYCAN PREZİDENTİ İLHAM ƏLİYEVİN YEKUN NİTQİ
- Mən çox şadam ki, bizim bu tədbirimiz, görüşümüz Şəki Olimpiya İdman Kompleksində keçirilir. Bildiyiniz kimi, bu kompleks 2002-ci ildə Milli Olimpiya Komitəsi tərəfindən tikilib istifadəyə verilmişdir. O vaxt, əlbəttə, biz fikirləşə bilməzdik, yəni ağlımıza da gələ bilməzdi ki, bu kompleksdə, həm də bu bölgədə sahibkarlığın inkişafına dair görüş keçiriləcəkdir. Biz by kompleksi ancaq idman məqsədi ilə tikdirmişdik. İndi isə bu, başqa məqsədlərə də gözəl xidmət edir.
Onu deyə bilərəm ki, Şəki Olimpiya İdman Kompleksi son illərdə, 2002-ci ilə qədər burada tikilən ən böyük obyektlərdən biridir və bəlkə də, ən böyüyüdür. Mən hesab edirdim ki, burada həm idman daha da sürətlə inkişaf edəcək, eyni zamanda, bu kompleksin tikintisi turizmin inkişafına xidmət göstərəcəkdir. Bütövlükdə, bu, Şəkinin müasirləşməsi üçün, öz tarixi simasını saxlamaq şərti ilə abadlaşması üçün yaxşı bir nümunə ola bilər.
Bu gün onu da qeyd etmək istəyirəm, Şəkidə olarkən görürəm ki, burada quruculuq-abadlıq işləri çox yaxşı səviyyədə gedir. Binalar təmir olunur, yeniləri tikilir, Azərbaycan memarlığının ən gözəl nümunələrindən biri olan Xan sarayı, - mən bu gün orada oldum, - təmir edilibdir. Başqa planlarımız da var, yararsız vəziyyətdə olan digər binalar da təmir olunmalıdır. Şəkidə gördüm ki, yollar salınır, səliqə-sahman var, abadlıq-quruculuq işləri var. Şəki çox gözəl şəhərdir, qədim şəhərdir. Əlbəttə, biz çalışmalıyıq ki, bu şəhəri həmişə belə abad vəziyyətdə saxlayaq.
Digər rayonlarda - Balakən, Zaqatala və Qaxda olarkən orada da gedən işlərlə tanış olurdum. Yerli orqanlara, o cümlədən onu da tövsiyə edirdim ki, xarici görünüşə də diqqət göstərsinlər. Harada ehtiyac varsa, qədim binalar təmir olunmalıdır. Çünki bu, bizim tarixi irsimizdir, mədəniyyətimizdir, bizim tariximizdir. Biz gərək bunu qoruyaq, saxlayaq.
Xüsusilə nəzərə alsaq ki, indi əlavə vəsait də var, büdcəmiz də artıbdır, bu məqsədlərə böyük diqqət göstərilməlidir. Bütün küçələrə yeni asfalt salınmalıdır, binalar rənglənməlidir, harada ehtiyac varsa, təmir olunmalıdır. Yeni binalar gözəl zövqlə tikilməlidir. Buna xüsusi diqqət göstərmək lazımdır. Çünki bu bölgənin özünəməxsus çox gözəl əlamətləri, xüsusiyyətləri var. Bu bölgə Azərbaycanın çox gözəl güşəsidir. Burada təbii gözəllik çox cəlbedicidir.
Eyni zamanda, bu gözəl abadlıq işlərini görəndə mən çox sevinirəm və sahibkarları da buna dəvət edirəm. Bəzi hallarda olur, görürsən ki, özünə gözəl müəssisə, yaxud da ev tikdirir, imarət tikdirir, amma onun ətrafı çox bərbad vəziyyətdədir. Biz gərək bu məsələlərə diqqət göstərək. Siz də çalışın ki, yaradacağınız müəssisələr bizim ümumi konsepsiyaya uyğun olsun. Əgər haradasa bina tikiləcəksə, gərək bunun xarici görünüşü gözəl olsun, zövqlə tikilsin ki, ölkəmiz daha da gözəlləşsin, şəhərlərimiz daha da abadlaşsın.
Sizi bir daha salamlayıram, sağ olun. Əminəm ki, bu kreditlərdən səmərəli istifadə edəcəksiniz və gələcəkdə bu kreditlərin həcmi artacaqdır. Mən sizə söz verirəm. Sağ olun.