Azərbaycan Prezidentinin güclü siyasi liderliyi Qoşulmama Hərəkatının Zirvə görüşündə bir daha təsdiqləndi
Bakı, 4 mart, AZƏRTAC
Danılmaz bir həqiqətdir ki, Azərbaycanın Qoşulmama Hərəkatına sədrliyinə qədər bu təşkilat beynəlxalq aləmdə kifayət qədər nüfuz qazana bilməyib. 2019-cu ildə Azərbaycan Qoşulmama Hərəkatına üzv dövlətlərin yekdil qərarı ilə 2019-2022-ci illər üzrə Qoşulmama Hərəkatına sədrliyə başlandığı vaxtdan təşkilat siyasi arenada söz sahibinə çevrilməyə başladı. Ölkəmizin bu təşkilata verdiyi töhfələri nəzərə alındı və üzv dövlətlərin təşəbbüsü ilə Azərbaycanın Qoşulmama Hərəkatına sədrlik müddəti 2023-cü ilə qədər uzadıldı.
Martın 2-də Qoşulmama Hərəkatının COVID-19 qarşı mübarizə üzrə Təmas Qrupunun Zirvə görüşü keçirildi. Zirvə görüşündə Prezident İlham Əliyevin Azərbaycanın sədrliyi dövründə Qoşulmama Hərəkatının fəaliyyəti, pandemiya ilə mübarizədə təşkilatın sədri qismində Azərbaycanın üzv dövlətlərə göstərdiyi humanitar və maliyyə yardımlarından danışması, eləcə də dünyada hökm sürən ikili standartların mövcud olması səbəbindən bir çox ölkələrin bundan əziyyət çəkdiyini vurğulaması böyük rəğbətlə qarşılandı. Zirvə görüşündə Azərbaycan Prezidentinin güclü siyasi lider olduğu bir daha öz təsdiqini tapdı.
Bu fikirləri AZƏRTAC-a açıqlamasında Milli Məclisin deputatı, professor Kamilə Əliyeva söyləyib.
Deputat bildirib ki, Qoşulmama Hərəkatının sədri olaraq Azərbaycanın məqsədi dünyada ədalətin, beynəlxalq hüququn bərpa olunmasıdır. Koronavirusla mübarizədə dünyada səylərin səfərbər edilməsi üçün Prezident İlham Əliyev BMT Baş Assambleyasının Xüsusi Sessiyasının çağırılması və "Peyvənd millətçiliyi"nə qarşı, eləcə də peyvəndlərin bütün dövlətlər arasında ədalətli paylanması təşəbbüsü də məhz Prezident İlham Əliyev tərəfindən irəli sürülüb. Dövlətimizin başçısının bu təklifi bütün dünya tərəfindən böyük rəğbətlə qarşılanıb.
Qoşulmama Hərəkatının inkişafı və güclənməsi istiqamətində təşkilatın sədri kimi Prezident İlham Əliyevin misilsiz xidmətləri olduğunu vurğulayan K.Əliyeva Qoşulmama Hərəkatının Parlament Şəbəkəsinin və Gənclər Təşkilatının məhz dövlətimizin başçısının təşəbbüsü ilə yaradıldığını da diqqətə çatdırıb. Azərbaycan Prezidenti sammitdə dünyanı narahat edən ən böyük problem - Şərq-Qərb qarşıdurmasını və bundan bir çox dövlətlərin əziyyət çəkməsini gündəmə gətirdi. Özünü demokratik, insan haqlarının müdafiəçisi kimi təqdim edən Fransa, əslində kiçik, zəif dövlətləri müstəmləkə altında saxlayan, xalqları soyqırımına məruz qoyan bir dövlətdir. Fransa Afrika, Cənub-Şərqi Asiya və digər bölgələrdə Qoşulmama Hərəkatına üzv olan ölkələrdə qanlı cinayətlər törədib və bu ölkələri öz müstəmləkəsinə çevirib. Prezidentimiz Zirvə görüşündə qətiyyətli şəkildə Fransanın törətdiyi cinayətləri bir daha bütün dünyaya bəyan etdi. Bu vaxta qədər heç bir dövlət başçısı Fransanın törətdiyi bu cinayətləri açıq şəkildə söyləməyib. Fransa kimi bir dövlətin BMT Təhlükəsizlik Şurasının daimi üzvü kimi qalması qəbuledilməzdir. Müstəmləkə siyasəti aparan Fransanın Təhlükəsizlik Şurasında başqa ölkələrin taleyinin həllində rol oynaması yolverilməzdir.
“Bu gün BMT-nin işlək bir qurum olmaması hər kəsə məlumdur. Təhlükəsizlik Şurasının beş daimi üzvü özlərinə sərf edən qərar və qətnamələr qəbul edir və digər dövlətlərin hüquqlarını, eləcə də beynəlxalq hüququn prinsiplərini kobudcasına pozurlar. Prezident İlham Əliyev əvvəlki çıxışında və budəfəki Qoşulmama Hərəkatının Zirvə görüşündə bir daha BMT-nin nizamnaməsində islahatlar aparılmasının vacibliyini səsləndirdi. Təhlükəsizlik Şurasının daimi üzvlərinin sayı artırılmalıdır. Afrika dövlətləri, Qoşulmama Hərəkatına üzv dövlətlərdən biri, eləcə də 2 milyarddan çox əhalisi olan islam dövlətlərinin təşkilatı olan İslam Əməkdaşlıq Təşkilatını təmsil edən ölkə Təhlükəsizlik Şurasında daimi üzv kimi təmsil olunmalıdır.
İnanırıq ki, Prezident İlham Əliyevin irəli sürdüyü ədalətli və dünya üçün əhəmiyyətli təkliflər bütün dünya ölkələri tərəfindən dəstəklənəcək və dünyada yeni, ədalətli bir nizam yaranacaq”, - deyə Kamilə Əliyeva əminliyini ifadə edib.
Bölmənin digər xəbərləri
