AZƏRBAYCAN-QAZAXISTAN SAZİŞİNƏ DAİR ƏLAVƏ PROTOKOL İMZALANMIŞDIR
Xarici İşlər Nazirliyində Xəzər dənizinin dibinin bölünməsi haqqında Azərbaycan Respublikası ilə Qazaxıstan Respublikası arasında sazişə dair Əlavə protokolun imzalanma mərasimi olmuşdur. Protokolda milli sektorların sərhədlərinin koordinatları müəyyən edilmişdir. İkitərəfli saziş 2001-ci il noyabrın 29-da Azərbaycan Prezidenti Heydər Əliyev və Qazaxıstan Prezidenti Nursultan Nazarbayev tərəfindən imzalanmışdı.
Azərbaycan xarici işlər nazirinin müavini Xələf Xələfov əlavə protokolun imzalanması mərasimindən əvvəl bildirmişdir ki, onun yekun mətni Qazaxıstan xarici işlər nazirinin birinci müavini Kayrat Abuseitov başda olmaqla bu ölkənin nümayəndə heyətinin ötən ilin sonunda ölkəmizə səfəri gedişində razılaşdırılmış, onun imzalanması isə Xəzər dənizinin hüquqi statusu haqqında Konvensiyanı hazırlayan xüsusi işçi qurupunun indi Bakıda keçirilən 8-ci iclası ilə bir vaxta salınmışdır.
Protokolu Azərbaycan xarici işlər nazirinin müavini Xələf Xələfov və Qazaxıstan xarici işlər nazirinin birinci müavini Kayrat Abuseitov imzalamışlar.
Bölmənin digər xəbərləri
