AZƏRBAYCAN QIZIL AYPARA CƏMİYYƏTİNDƏ GÖRÜŞ
AZƏRTAC xəbər verir ki, ölkəmizdə səfərdə olan Beynəlxalq Qızıl Xaç Komitəsinin prezidenti Yakob Kellenberqer aprelin 3-də Azərbaycan Qızıl Aypara Cəmiyyətinin prezidenti, Milli Məclisin deputatı Novruz Aslanovla görüşmüşdür. N.Aslanov Azərbaycan Qızıl Aypara Cəmiyyətinin fəaliyyəti, həyata keçirilən layihələr, gələcək planları və beynəlxalq təşkilatlarla əməkdaşlığı barədə qonağa ətraflı məlumat vermişdir.
Yakob Kellenberqer Azərbaycan Qızıl Aypara Cəmiyyətinin işindən razılığını bildirmişdir. Qeyd etmişdir ki, Beynəlxalq Qızıl Xaç Komitəsi ayrı-ayrı ölkələrin müvafiq təşkilatları ilə sıx əməkdaşlıq edir. Səfərin məqsədlərindən biri də iki təşkilat arasında əməkdaşlığın perspektivləri barədə fikir mübadiləsi aparmaqdır.
Sonra görüşdə qarşılıqlı maraq doğuran digər məsələlər ətrafında geniş fikir mübadiləsi aparılmışdır.
Bölmənin digər xəbərləri
